Azərbaycan Tailand şirkəti ilə əməkdaşlığa başlayır

İqtisadiyyat Nazirliyi yanında Kiçik və Orta Biznesin İnkişafı Agentliyi (KOBİA), İqtisadi Zonaların İnkişafı Agentliyi (İZİA) və Tailandın “Supreme Pharmatech Co., LTD” şirkəti arasında əməkdaşlıq haqqında üçtərəfli Anlaşma Memorandumu imzalanıb.

News24.az xəbər verir ki, bu barədə KOBİA məlumat yayıb.

Sənədi KOBİA-nın İdarə Heyətinin sədri Orxan Məmmədov, İZİA-nın İdarə Heyətinin sədri Elşad Nuriyev və “Supreme Pharmatech Co., LTD”nin baş direktoru Yuri Nelepçenko imzalayıblar.

Memorandumda əczaçılıq sahəsində birgə tədbirlərin, proqram və layihələrin həyata keçirilməsi, yerli kadr potensialının inkişafına dəstək, KOB-lar üçün təlimlərin təşkili, tədqiqatların aparılması, əczaçılıq və qida əlavələri sektoruna töhfə verə bilmələri üçün KOB-ların məlumatlandırılması və qarşılıqlı əməkdaşlıq, yerli xammal bazasının inkişafı üçün birgə tədbirlərin həyata keçirilməsi də daxil olmaqla əczaçılıq məhsulları istehsalı sahəsində təchizat zəncirinin inkişaf etdirilməsi, əczaçılıq sənayesində fəaliyyət göstərən KOB və startapların inkişafına birgə dəstək, əczaçılıq sahəsində biznes inkubatorların və tədqiqat mərkəzlərinin dəstəklənməsi kimi istiqamətlərdə birgə əməkdaşlıq nəzərdə tutulur.

Həmçinin, tədbir çərçivəsində İZİA və Tailand-Azərbaycan birgə şirkəti olan “Supreme Pharmatech Manufacturing” MMC arasında Müqavilə imzalanıb.

Tədbir çərçivəsində O.Məmmədov, E.Nuriyev, Y.Nelepçenko və “Supreme Pharmatech Manufacturing”in direktoru Müşfiq Hüseynov arasında görüş keçirilib. Görüşdə tərəflər arasında imzalanmış üçtərəfli sənəddən irəli gələn məsələlər, əməkdaşlıq imkanları müzakirə edilib.