Dünya dizel yanacağında rekord QITLIQ

Dünya dizel yanacağı ehtiyatları bu gün ən aşağı səviyyədədir. Bu, ənənəvi olaraq yanacağa tələbatın artmasına səbəb olan Şimal yarımkürəsində yaxınlaşan istilik mövsümü fonunda mütəxəssislərin qorxusunu artırır.

News24.az xəbər verir ki, bu barədə “Bloomberg” məlumat yayıb. 

Analitiklərin fikrincə, ehtiyatların hazırkı səviyyəsi qarşıdakı qış aylarında iqtisadiyyatın tələbatını ödəməyə kifayət etməyə bilər. Təchizat tərəfində hər hansı bir pozulma və ya tələbin gözlənilməz artımı bu kritik enerji məhsulunun qiymətini sürətlə yüksəldə bilər.

Xüsusilə Avropada və ABŞ-ın Atlantik sahillərində vəziyyət gərgindir. “Wood Mackenzie” tərəfindən şimali və qərbi Avropada dizel ehtiyatlarının yaxın aylarda azalacağı proqnozlaşdırılır.

Qeyd olunub ki, vəziyyət neft emalı zavodlarının daha yüngül neft növlərinə keçməsi ilə daha da ağırlaşıb ki, bu da dizel yanacağının istehsalının azalmasına səbəb olub.

Analitiklər qeyd ediblər ki, hətta Çinin yanacaq ixracına yeni kvotalar verməsi çətin ki, vəziyyəti kökündən yaxşılaşdırsın. Tikinti sektorundakı problemlərə baxmayaraq, Çindən daxili tələb gözləniləndən yüksək olub.

“Beləliklə, qlobal iqtisadiyyat qış mövsümü ərəfəsində dizel yanacağı ehtiyatlarının tarixi minimumuna yaxınlaşıb. Bu, önümüzdəki aylarda tədarük zəncirlərində hər hansı bir pozulma yaranacağı təqdirdə kəskin qiymət artımına gətirib çıxaracaq”-məqalədə vurğulanıb.

Ayşən