Əhaliyə XƏBƏRDARLIQ

Bakı Nəqliyyat Agentliyi ötən gecədən başlayaraq müşahidə edilən güclü küləkli hava şəraiti ilə əlaqədar şəhər yollarında ictimai nəqliyyat infrastrukturuna nəzarəti artırıb.

Agentlikdən News24.az-a verilən məlumata görə, küləyin təsirindən yarana biləcək xoşagəlməz halların vaxtında aşkar edilərək aradan qaldırılması üçün zəruri tədbirlər görülür: “Bu məqsədlə agentliyin mobil qrupları yol nişanları və avtobus dayanacaq pavilyonlarına baxış keçirir.

Bu cür hava şəraitinin davam etdiyini nəzərə alaraq sərnişinlərdən dayanacaq pavilyonlarında avtobus gözləyərkən diqqətli olmalarını xahiş edirik”. Agentlikdən qeyd edilib ki, Nəqliyyat Mübadilə Mərkəzlərinin ərazisində yolun hərəkət hissələrinə çıxmamağı, yalnız müəyyən edilmiş dayanacaq məntəqələrində avtobuslara minib düşməyi, yolun qarşı tərəfinə keçərkən müəyyən olunan piyada keçidlərindən istifadə etmələrini tövsiyə edilir: “Sürücülərə isə hərəkətdə olarkən yollarda müəyyən edilən sürət həddinə və yol nişanlarının tələblərinə riayət etsinlər”.