SON DƏQİQƏ: Fatih Terimin "Panatinaikos"dakı dövrü başa çatdı

Yunanıstan Superliqasında "Panatinaikos"u çalışdıran Fatih Terimlə yollarını ayırıb.

News24.az xəbər verir ki, təcrübəli çalışdırıcı Yunanıstan Superliqasının pley-off mərhələsində Paoka 4:1 hesablı məğlubiyyətdən sonra yaşıl-ağlılarla çempionluq ümidlərini itirib.

Ardıcıl pis nəticələrdən sonra yaşıl-ağlılar rəhbərliyi ilə masaya oturan Fatih Terim qarşılıqlı razılaşma əsasında müqaviləni pozub.

Terim açıqlamasında, "Keçən dekabr ayından bəri komandamla bütün gücümüzlə çalışdığımız Panathinaikos Futbol Klubunda məqsədimiz 2023-2024 mövsümünü çempion olaraq tamamlamaq idi. Çox dəyərli Panathinaikos azarkeşlərinə 13 ildir əldə edə bilmədikləri çempionluq təcrübəsini qazandırmaq idi. Cənab prezidentlə dünən axşam bir araya gəldik və vəziyyəti qiymətləndirdik. Peşəkar əlaqələrimizin davam etməməsinə qərar verildi" deyib.

Qeyd edək ki, Fatih Terim "Panatinaikos"la 26 matçda 14 qələbə, 6 məğlubiyyət və 6 heç-heçə edib. Hər matçda orta hesabla 1,85 xal toplayıb.

Günel Məlikzadə