Qara dəlik tapıldı

Astronomlar 8-10 milyard il əvvəl genişlənən Süd Yolu tərəfindən udulmuş nisbətən kiçik qalaktikanın görünən qalıq nüvəsi olan ulduz çoxluğunu diqqətlə araşdırıblar. Bu klasterin mərkəzində gizlənən obyekt onları heyrətə gətirib.

News24.az AZƏRTAC-a istinadla xəbər verir ki, tədqiqatçılar bildiriblər ki, bu çoxluqdakı yeddi ulduzun qeyri-adi hərəkəti onların mərkəzində orta ölçülü qara dəliyin varlığına inandırıcı dəlil verir. Bunlar tək bir ulduzun partlaması nəticəsində əmələ gələn adi qara dəliklər sinfindən daha böyükdür, lakin əksər qalaktikaların nüvəsində yaşayan begemotlardan kiçikdir.

Yer kürəsindən təqribən 15,800 işıq ili uzaqlıqda yerləşən “Omeqa Sentavr” adlanan klasterdə təxminən 10 milyon ulduz var. Tədqiqatçıların fikrincə, onun içindəki qara dəlik Günəşdən ən azı 8200 dəfə böyükdür.

Süd Yolunun mərkəzində yerləşən Oxatan A* adlı superkütləli qara dəlik Günəşin kütləsindən 4 milyon dəfə böyükdür. Bu, digər qalaktikalarda Günəşin kütləsindən milyardlarla dəfə böyük olan superkütləli qara dəliklər ilə müqayisədə cırtdan hesab olunur.

Almaniyadakı Maks Plank Astronomiya İnstitutunun astronomu Maksimilian Haberle deyir: “Ümumilikdə, “Omeqa Sentavr” klasterində orta kütləli qara dəliklərin olub-olmaması uzun müddətdir müzakirə olunurdu və bizim kəşfimiz bu diskussiyaların həllinə kömək edə bilər”.