Google-dan "birdəfəlik" ağıllı saatlar

Avqustun ortalarında təqdim edilən Google Pixel Watch 3 smart saatı əslində birdəfəlikdir, çünki xarab olarsa, onu təmir etmək mümkün deyil. 

News24.az xəbər verir ki, bu barədə “Android Authority” portalı məlumat yayıb.

Əvvəlki versiyalarda olduğu kimi, Pixel Watch 3-də hər hansı hissə xarab olarsa və ya dəyişdirilməlidirsə, onları təmir etmək mümkün deyil. Yeganə həll yolu saatı dəyişdirməkdir. Google bunu jurnalistlərə təsdiqləyib.

Bundan əlavə, zədələnmiş cihazların necə utilizasiya ediləcəyi də məlum deyil ki, bu da ekspertlər arasında ekoloji narahatlıq yaradır.

Qeyd edək ki, Pixel Watch 3 sentyabrın 10-da satışa çıxacaq. Görünüş olaraq saat Pixel Watch 2-yə bənzəyir, lakin bu il iki ölçüdə təklif olunur: 41 və 45 mm. Yeni məhsul daha hamar ekran, 20% daha sürətli enerji doldurma, yenilənmiş Wear OS 5 əməliyyat sistemi və 45 mm model üçün 307 mAh və ya 420 mAh tutumlu daha böyük batareya əldə edilib.

Saatın batareyasının işləmə müddəti 24 saat, enerjiyə qənaət rejimində isə 36 saata qədərdir. Google Pixel Watch 3-ün qiyməti 349-499 dollar arasında dəyişir.

Məryəm İlhamqızı