Kosmosun qoxusu nəyə bənzəyir?

İllərdir maraqla qarşılanan 'Kosmos nə kimi qoxuyur?' sualı bir neçə dəfə və müxtəlif astronavtların şərhləri ilə müzakirə edilən mövzuya çevrilib. Ancaq bir müddətdir Beynəlxalq Kosmik Stansiyada qapalı qalan iki astronavt bu məsələ ilə bağlı aktual şərhlərini paylaşıb. 

News24.az xəbər verir ki, Beynəlxalq Kosmik Stansiyada (BKS) gözlənilmədən uzun müddət qalan iki amerikalı astronavt Suni Williams və Butch Wilmore kosmosun sirli dünyası haqqında maraqlı təfərrüatlar paylaşıblar. Boeing Starliner kosmik gəmisinə qayıdışı təhlükəsizlik səbəbiylə 2025-ci ilə təxirə salınan astronavtlar hazırda altı otaqlı ev ölçüsündə bir ərazidə doqquz nəfərlə birlikdə yaşayırlar.

Astronavtların açıqlamalarına görə, kosmosun özünəməxsus qoxusu var. Kanadalı astronavt Chris Hadfield kosmosda gəzinti zamanı hiss etdiyi bu qoxunu "hərəkətləndirici və başqa dünya" adlandırır. İngilis astronavt Helen Şarman kosmosda yalnız bir qoxunun olduğunu və buna tez öyrəşdiklərini bildirir.

Bu maraqlı kosmos qoxusunun mənbəyi kosmosdakı güclü radiasiyadan qaynaqlanır. Şarmanın sözlərinə görə, radiasiya skafandr və ya elmi avadanlıq kimi çıxıntılı obyektlərin səthində sərbəst radikallar yaradır. Bu radikallar stansiyanın daxilindəki oksigenlə reaksiyaya girərək metal və kükürd qoxusunu yaradır.

Sözügedən astronavtlar etiraf edirlər ki, onlar Yerə qayıtdıqda hissiyyat təcrübələrinə daha çox dəyər verirlər. 

Şarman: "Kosmosda hava yoxdur - üzünüzdə yağış və ya saçınızda külək hiss etmirsiniz və yalnız bir qoxu hiss edirsiniz. Mən indi bu təcrübələrə daha çox əhəmiyyət verirəm!” deyir.

Qeyd edək ki, ISS-dəki həyat astronavtların uyğunlaşma qabiliyyətlərini sınayır. Onların gündəlik iş rejimi elmi təcrübələr, idman və özünə qulluqdan ibarətdir. 8 günlük missiya üçün kosmosa gedən astronavtlar düz 8 aydır ki, qapalı qalıblar. Hər şey yaxşı olsa, sentyabrın 25-də dünyaya qayıdacaqlar.

Günel Məlikzadə