Burun spreyi şəklində peyvənd TƏSDİQLƏNDİ

AstraZeneca tərəfindən istehsal edilmiş və 2003-cü ildə səhiyyə mütəxəssisləri tərəfindən idarə olunması üçün təsdiq edilmiş FluMist peyvəndi gələn ildən etibarən onlayn apteklər vasitəsilə Amerika ictimaiyyətinə təqdim ediləcək.

News24.az xəbər verir ki, bu iynəsiz sprey onlayn yoxlama testindən sonra istifadəçiyə göndəriləcək. 

FDA rəsmisi Peter Marks, "Özünüzə və ya başqasına tətbiq edə biləcəyiniz ilk qrip peyvəndi təhlükəsiz və təsirli bir seçim təklif edir. Bu yeni seçim peyvənd əldə etməyi asanlaşdıra, fərdlər və ailələr üçün rahatlıq təmin edə bilər" deyib.

18 yaşından yuxarı hər kəs bu peyvəndi həm özünə, həm də başqasına tətbiq edə biləcək. Peyvənd 2 yaşdan 49 yaşa qədər olan insanlarda istifadə üçün təsdiq edilmişdir.

FluMist peyvəndi zəifləmiş canlı qrip virusuna əsaslanan formulaya malikdir.

Qeyd edək ki, Ümumdünya Səhiyyə Təşkilatının (ÜST) məlumatına görə, mövsümi qrip hər il təxminən bir milyard insana yoluxur və 650 minə qədər insanın ölümünə səbəb olur.

Məryəm İlhamqızı