Qasırğa Meksikanı vurdu: ÖLƏNLƏR VAR

Con qasırğası Meksikanın cənubunu vurub. Bazar ertəsi axşam quruya çatan qasırğa sel və torpaq sürüşməsinə səbəb olub.

News24.az xəbər verir ki, qasırğanın yaratdığı güclü külək nəticəsində ağaclar aşıb, evlərin damları uçub, elektrik dirəkləri sıradan çıxıb.

Gerrero əyalətinin qubernatoru Evelin Salqado verdiyi açıqlamada, Tlacoachistlahuaca qəsəbəsində 2 nəfərin və Malinaltepecdə bir nəfərin torpaq sürüşməsi nəticəsində öldüyünü bildirib.

Oaxaca ştatının Puerto Escondido və Huatulco hava limanlarında uçuşların dayandırıldığı, uçuşların bu gün səhər saatlarından etibarən bərpa edildiyi bildirilib.

Mülki müdafiə qrupları və Milli Qvardiya Gerrero və Oaxaca ştatlarında palçıqla örtülmüş yolları təmizləməyə başlayıb.

Elektrik şirkəti CFE 99 min evdə elektrik enerjisinin kəsildiyini və təmirdən sonra əksər abonentlərə elektrik enerjisinin verildiyini açıqlayıb.

ABŞ Milli Qasırğa Mərkəzinin məlumatına görə, Con qasırğası tropik tufana çevrildikdən sonra onun intensivliyi azalaraq ölkənin daxili ərazilərinə doğru irəliləyib.

Günel Məlikzadə