Marketlərdən şikayət: "Hörmətsiz və kobud davranırlar"

“Bu gün Azərbaycanda istər ticarət, istərsə də xidmət obyektlərində müştəri məmnuniyyəti hər şeydən - obyekt sahibinin istəyindən, satıcıların davranışından sonra gəlir. Bir çox dövlət və biznes qurumları hələ dərk etmirlər ki, onlar istehlakçıların hesabına yaşayırlar. Ordunu, dövləti, biznesi, bir sözlə, hamını saxlayan istehlakçılardır. Ona görə də heç bir müəssisə istehlakçıya qarşı hörmətsizlik etməməli, onu narazı salmamalıdır. Müştərilər çox hallarda xidmətin, adi insani rəftarın onlara xoş gəlmədiyini görüb ikinci dəfə həmin yerə getmirlər. Lakin görünür, bu cür vəziyyət obyekt sahiblərini və həmin obyektlərin əməkdaşlarını elə də maraqlandırmır. Belə olmasaydı, obyekt açmazdan və ya əməkdaş işə götürməzdən əvvəl müştəri məmnuniyyəti haqqında heç olmasa, adi məlumatları öyrənərdilər. Bu halda da itirən müştəri yox, obyekt sahibi olur”.

News24.az bildirir ki, bunu Bakupost.az -a Azad İstehlakçılar Birliyinin (AİB) sədri Eyyub Hüseynov deyib.

Onun sözlərinə görə, satıcı mütləq istehlakçıyla nəzakətli davranmalı, müştərinin istədiyi dildə danışmalıdır. Ağıllı biznes qurumları vətəndaşların simpatiyasını qazanmaq üçün rəqabət aparmalıdır:

“Xidmət səviyyəsindən məmnun qalmayan müştəri alış-veriş üçün digər marketlərə üz tutur. Nəticədə müştərilərini itirən market sahibinin qazancı və gəliri aşağı düşür”.

Ekspert bildirib ki, bəzən satıcların müştərilərlə kobud davranışının şahidi oluruq. Müştəri ərzaq mağazasında hansısa qidanın yerini, qiymətini soruşduqda, satıcı həmin müştəriyə elə cavab verir ki, insan mağazaya girdiyinə və nəsə aldığına peşman olur:

“Bəzi mağazalarda satıcıların alıcılara qarşı saymazyana davranışlarının şahidi oluruq. Çünki satıcıların çoxu necə xidmət göstərməli olduqlarından bixəbərdirlər. Müştəri ilə necə davranmalı olduqlarını bilmirlər. Rəhbəri olduğum birliyə müraciətlərin 40 faizi satıcı kobudluğu ilə bağlı olur. Bu problemin həlli ölkədə mükəmməl istehlakçı siyasətinin qurulmamasıdır. İstehlakçıların hüquqlarının qorunması siyasəti zəifdir”.