Azərbaycanda bir bağça 4-cü dəfə yandı

3 il əvvəl fəalliyyətini dayandıran bağça 4-cü dəfədir ki, yanır.

News24.az Axar.az-a istinadla xəbər verir ki, Mingəçevirin Puşkin küçəsində yerləşən, hazırda istifadəsiz olan 8 saylı körpələr evi-uşaq bağçasında noyabrın 3-də yanğın hadisəsi qeydə alınıb.

Qəfildən alovlanan binanın birinci mərtəbəsində başlayan yanğını söndürmək mümkün olmadığından hadisə yerinə yanğınsöndürənlər çağırılıb. Yanğınsöndürmə briqadası bağçanın ərazisində başlayan yanğını lokallaşdıraraq onun ətraf ərazilərə yayılmasına imkan verməyib. Sakinlər iddia edirlər ki, sözügedən təhsil müəssəsində yanğınlar qəsdən törədilir.

Daxili İşlər Nazirliyinin (DİN) Mətbuat Xidmətinin Şəki regional qrupundan "Xəzər Xəbər"ə bildirilib ki, Mingəçevirdə yerləşən 8 saylı körpələr evi-uşaq bağçasında qeydə alınan yanğın hadisəsi ilə bağlı araşdırma aparılır.