Xalq şairi Nəbi Xəzrinin 95 illiyinə həsr olunmuş ədəbi-bədii gecə keçirilib - FOTOLAR

Beynəlxalq Muğam Mərkəzində Xalq şairi Nəbi Xəzrinin 95 illiyinə həsr olunmuş "Mənim kainatım şeirlərimdir" adlı ədəbi-bədii gecə keçirilib.
News24.az xəbər verir ki, tədbirdə Nəbi Xəzrinin həyat və yaradıcılığı barədə ətraflı danışılıb, onun bədii söz sənətini yeni keyfiyyətlərlə zənginləşdirərək imkanlarını genişləndirdiyi bildirilib.

Xalq yazıçısı Çingiz Abdullayev çıxış edərək bildirib ki, Nəbi Xəzri üç qardaşını və atasını erkən yaşlarında itirib. Gəncliyi Böyük Vətən müharibəsinə təsadüf edib müharibənin ağrılı-acılı günlərini yaşayıb, ancaq cəmiyyətdə özünə böyük yer tutmaq üçün əzmkarlığı, öz üzərində daim çalışması, təhsilə, elmə böyük önəm verməsi və çalışqanlığı ilə özünə ad qazanıb.

Bildirib ki, insanın mənəvi aləmini, düşüncə və axtarışlarını yüksək bədiiliklə əks etdirən, bəşəriliklə milliliyi üzvi şəkildə birləşdirən Nəbi Xəzri poeziyası dünya, insan və təbiət haqqında fəlsəfi məzmunu, yüksək humanizmi, böyük vətəndaşlıq qayəsi və milli koloriti sayəsində geniş oxucu kütləsinin rəğbətini qazanıb.

Xalq şairi Nəriman Həsənzadə isə humanitar dəyərləri poetik-fəlsəfi mənalandırma gücünə malik olan Nəbi Xəzrinin yaradıcılığının dərin lirizm, vətəndaşlıq qayəsi ilə gənc nəslin vətənpərvərlik ruhda tərbiyəsində böyük gücə malik olduğunu qeyd edib.

N.Xəzri geniş və hərtərəfli yaradıcılıq yolu keçərək, şair, nasir, dramaturq, publisist və tərcüməçi kimi şöhrət qazandığı, XX əsr Azərbaycan ədəbiyyatının inkişafı naminə böyük xidmətlər göstərmiş qələm sahiblərindən biri olduğu vurğulanıb. 

Sonra çıxış edən şairin oğlu Arzu Babayev atasına göstərilən etirama, diqqətə görə Prezident İlham Əliyevə təşəkkürünü bildirib.
Tədbirdə Nəbi Xəzrinin şeirləri səsləndirilib və sözlərinə yazılmış mahnılar sevilən müğənnilərin ifasında təqdim olunub.

Qeyd edək ki, Nəbi Xəzri ölkəmizin müxtəlif mətbu orqanlarında çalışıb. 1958–1965-ci illərdə Azərbaycan Yazıçılar İttifaqının katibi, 1965–1971-ci illərdə Azərbaycan Dövlət Televiziya və Radio Verilişləri Komitəsi sədrinin müavini, 1971–1974-cü illərdə isə Azərbaycan Mədəniyyət nazirinin müavini vəzifələrində işləyib. 1974-cü ildən etibarən Azərbaycanın Xarici Ölkələrlə Dostluq və Mədəni Əlaqələr Cəmiyyətinin rəyasət heyətinə sədrlik edən Nəbi Xəzri 1992-ci ildən "Azərbaycan Dünyası" Beynəlxalq Əlaqələr Mərkəzi adı ilə fəaliyyət göstərən həmin təşkilatın sədri olub. O, 2007-ci ilin yanvarın 15-də dünyasını dəyişib və Fəxri Xiyabanda dəfn edilib.

Sevda Bayramova
FOTO: Fərid Şabanov