"Deyəsən, imtahan qaydalarını kefinizcə dəyişməyə vərdiş etdiniz" - Təhsil eksperti DİM-i İTTİHAM ETDİ

22 may 2022-ci il tarixində II və III ixtisas qrupu üzrə ali təhsil müəssisələrinə qəbul imtahanından kənarlaşdırılan abituriyentlərin növbəti imtahana buraxılmayacağı haqda DİM-in dünənki qərarını təhsil eksperti Kamran Əsədov tənqid edib.

News24.az xəbər verir ki, ekspert bu haqda sosial şəbəkədə paylaşım edib. O bildirib ki, DİM-in bu qərarı yanlışdır: " Bildiyiniz kimi, 22 may 2022-ci il tarixində Dövlət İmtahan Mərkəzi tərəfindən II və III ixtisas qrupu üzrə ali təhsil müəssisələrinə qəbul imtahanı keçirilib. Bu normal xəbərdir. Amma normal olmayan bundan sonra başlayır. 

 
Hörmətli DİM, sizin bu imtahanda qayda pozduğuna görə, həmən abituriyentləri növbəti imtahana da buraxmamaq ixtiyarınız, hüququnuz yoxdur. 
Bir də yazıram, qəbul qaydalarında qeyd olunur ki, (6.5.) abituriyentin bu Qaydaların 6.4-cü bəndində göstərilən hərəkətlərə yol verməsi halları mərkəz tərəfindən aşkar edildikdə, onun müsabiqə (imtahan) nəticələri ləğv edilir. Yəni həmən imtahan nəticəsi. Daha növbəti imtahana buraxılmağa məhdudiyyət yoxdur.  Bundan başqa, mövcud qanunvericilik və qoşulduğumuz konvensiyalarda cəzanın təyin edilməsi təcrübəsi var. İnsan yalnız törətdiyi əmələ görə bir dəfə cəzalanır. Bunlar 16-17 yaşlı uşaqlardır. Bəli, səhv ediblər. Amma bu o demək deyil ki, onların təhsil alma hüquqları tam şəkildə məhdudlaşdırılmalıdır. 

Ona görə də, DİM-in dünən açıqladığı qayda pozan abituriyentlərin ikinci dəfə imtahanda iştirakına məhdudiyyət qoyulacaq ifadəsi yanlışdır. 
Amma maraqlıdır ki, nə Təhsil Nazirliyi yanında İctimai Şura, nə Təhsil Nazirliyi şagirdlərin taleyi, müqəddəratı ilə bağlı məsələlərə münasibət bildirmir".