İş adamı Sərvər Bəşirliyə maşın bağışladı, “Yeni Müsavat” təqdim etdi - FOTOLAR

Türkiyədə baş verən zəlzələdən zərər çəkənlərə yardım toplanıldığı zaman Azərbaycanda bir fenomen aşkar olundu.

Özünün köhnə "Jiquli"si ilə yardım məntəqəsinə əşya daşıyan zaman çəkilən bir foto Laçın qaçqını Sərvər Bəşirlini fenomenə çevirdi.
Sərvərin bu yardımı hər kəsin ürəyinə toxundu. Həm yerli, həm də xarici mediada onun fotosu, daha sonra isə təvazökar videoları gündəm oldu. Bu gün isə köhnə avtomobili ilə tanınan Sərvər Bəşirliyə Türkiyəli iş adamı tərəfindən yeni avtomobil hədiyyə edilib.

News24.az  xəbər verir ki, xeyriyyəçi iş adamı, Türkiyədə bir çox yardımları ilə tanınan, “Atlas” mədən, mühəndislik, inşaat və konsaltinq şirkətinin sahibi Səbahəddin Civelek Sərvər Bəşirlinin bu addımına cavab olaraq, ona avtomobil hədiyyə edib.

Avtomobil Sərvər Bəşirlinin atasına iş adamının  yaxın dostu, onu bu xeyir işdə təmsil edən “Yeni Müsavat” Media Qrupunun rəhbəri Rauf Arifoğlu tərəfindən təqdim edilib. Sərvər Bəşirlinin özü hazırda Türkiyənin zəlzələ bölgəsindədir, Azərbaycandan gedən könüllü qrupla orada qardaş ölkəyə dəstək olur. Türkiyəyə yola düşməzdən öncə Sərvər Bəşirli iş adamı Səbahəddin Civeleklə görüntülü danışıb və olduqca təsirli anlar yaşanıb.  

Səbahəddin Civelek

Qeyd edək ki, yaxın zamanlarda iş adamının Bakıya gəlişi də gözlənilir.
Musavat.com xəbər verir ki, S. Civelek bir neçə dəfə "Yeni Müsavat" Media Qrupu ilə birlikdə Türk dünyası ilə bağlı toplantı və qurultaylara sponsorluq edib.

İş adamı Türkiyəni sarsıdan zəlzələ fəlakətinin aradan qaldırılması üçün də fondlara böyük miqdarda yardımlar edib.
Musavat.com xəbər verir ki, hədiyyə təqdimetmə törənində Sərvər Bəşirlinin atası Rasim Bəşirli iş adamı Səbahəddin Civelek bəyə və Türkiyə dövlətinə təşəkkür edib: "Oğlum bu işi hansısa mükafat, hədiyyə üçün görməyib. Belə olacağını da gözləmirdim. Özümüz qaçqın həyatı yaşamışıq, evsizliyin nə olduğunu bilirik. Bu səbəbdən də Türkiyədəki qardaşlarıma yardım etmək ürəyimizdən gəldi. O foto olmasaydı, bu hadisəni heç kim də bilməyəcəkdi. Oğluma göstərilən bu diqqətə görə çox təşəkkür edirəm".

Bu xoş əmələ görə “Yeni Müsavat” Media Qrupunun rəhbəri Rauf Arifoğlu da dostu, ülküdaşı Səbahəddin Civelek bəyə təşəkkürlərini bildirib: "Səbahəddin bəyin ürəyi türk dünyası ilə döyünür. Onun türklük uğruna yapdığı fədakarlıqları saysan, bitməz. Əziz qardaşıma və bu işdə yaxından iştirak edən can dostum Ali Yıldırıma çox minnətdaram. Buradakı insanlar bu jestin sayəsində bir daha gördülər ki, Türkiyə yıxılmayıb, ayaqdadır, dostunu - düşmənini seçəcək, hətta mükafatlandıracaq durumdadır. Türkiyə bizim canımız, hər şeyimizdir. Yaxşı ki, Türkiyə var, yaxşı ki, Səbahəddin bəy, Ali bəy kimi ülküdaşlarım var..."

Hədiyyə təqdim olunandan sonra Sərvər Bəşirli Türkiyədən Musavat.com-un redaksiyasına video-təşəkkür göndərib.