Afina yaxınlığında yanğın böyüyür

Yunanıstanda meşə yanğınları ilə mübarizə dördüncü gündür davam edir. Afina şəhərinin şimal-qərbində geniş ərazini əhatə edən alov güclü küləyin təsiri ilə yaşayış evlərini, şam meşələrini və kənd təsərrüfatı sahələrini məhv edir.

News24.az xəbər verir ki, hazırda bölgədə 400-dən çox yanğınsöndürən və 21 hava vasitəsi alovun qarşısını almağa çalışır. Yanğının yaşayış məntəqələrinə çatmaması üçün ağır texnika ilə xüsusi qoruyucu zolaqlar çəkilir.

Yunanıstanın İqlim Böhranı üzrə nazir müavini Kostas Katsafados bildirib ki, son günlər müşahidə olunan güclü və dəyişkən külək yanğınsöndürmə təyyarələrinin dənizdən su götürməsinə mane olub. Buna görə də əsas yük quru qüvvələrinin üzərinə düşüb.

Mütəxəssislər qeyd edirlər ki, ölkənin yanğınsöndürmə xidməti uzunmüddətli kadr çatışmazlığı və köhnəlmiş texniki baza səbəbindən ciddi çətinliklərlə üzləşib. Həmkarlar ittifaqının rəhbəri Nikos Lavranos bildirib ki, fasiləsiz işləyən yanğınsöndürənlərin tükənməsi vəziyyəti daha da ağırlaşdırır.

İlkin araşdırmalar göstərir ki, ötən həftə Viotiya bölgəsində baş verən yanğına külək turbinlərindən elektrik ötürən özəl xəttdə titrəyən naqillərdən çıxan qığılcımlar səbəb olub. Faktla bağlı elektrik mühəndisi və podratçı saxlanılıb.

Qeyd olunur ki, son illərdə Yunanıstanda iri meşə yanğınlarının əsas səbəbi məhz nasaz elektrik xətləri hesab edilir. Onlar qəsdən törədilən yanğınları və səhlənkarlıq hallarını geridə qoyur. (Reuters)