Anna Akopyan məhkəməyə verildi

Ermənistanın baş naziri Nikol Paşinyanın həyat yoldaşı Anna Akopyan ilə “Müstəqil Müşahidəçi” blokunun nümayəndəsi Daniel İoannisyan arasında hüquqi mübahisə üzrə məhkəmə prosesi başlayır.

News24.az xəbər verir ki, “Vətəndaşların Məlumatlı Birliyi”nin koordinatoru və “Müstəqil Müşahidəçi” Alyansının nümayəndəsi Daniel İoannisyan və onun təmsil etdiyi Alyans Ermənistanın İnzibati Məhkəməsinə müraciət edərək “Mənim Addımım” Xeyriyyə Fondunun icraçı direktoru Anna Akopyanın 15 ayrı epizod üzrə inzibati məsuliyyətə cəlb edilməsini tələb ediblər.

Bundan əvvəl “Müstəqil Müşahidəçi” bloku fondun fəaliyyəti zamanı qanun pozuntularının baş verdiyini iddia edib.

Buna cavab olaraq Anna Akopyan bildirib ki, fond Ermənistan Respublikasının heç bir qanununu pozmayıb və hüquqşünaslar komandasına Daniel İoannisyan barəsində cinayət işinin başlanılması üçün əks-hüquqi addımlar atmağı tapşırıb.

İyunun 11-də məlum olub ki, “Vanadzor Helsinki Vətəndaş Assambleyası”, “Vətəndaşların Məlumatlı Birliyi” və “Birbaşa Demokratiya” qeyri-hökumət təşkilatlarının nümayəndəsi Anait Mkrtçyan 2 iyun 2026-cı il tarixli iddia ərizəsi ilə İnzibati Məhkəməyə müraciət edib.

İddiada “Mənim Addımım” Fondunun icraçı direktoru Anna Akopyanın Ermənistan Respublikasının İnzibati Xətalar Məcəlləsinin 40.16-cı maddəsinin 1-ci hissəsində nəzərdə tutulmuş əmələ görə inzibati məsuliyyətə cəlb edilməsi tələb olunur.

Söhbət 29 mart 2026-cı ildə qeydə alınmış hadisədən gedir. Həmin vaxt fond öz biznesini qurmaq və ya inkişaf etdirmək məqsədilə 29 gənc ailəyə 1–2 milyon dram məbləğində qrant ayırmışdı.

İddiaçı Anna Akopyanın minimum əməkhaqqının 400 misli həcmində cərimələnməsini tələb edir.

Ermənistan İnzibati Məhkəməsinin hakimi Aqasi Darbinyan adı çəkilən QHT-lərin Anna Akopyana qarşı onun inzibati məsuliyyətə cəlb olunması tələbi ilə qaldırdığı iddianın icraata qəbul edilməsi barədə qərar verib.

İş üzrə ilkin məhkəmə baxışı 2 noyabr 2026-cı il saat 12:50-də Ermənistan Respublikası İnzibati Məhkəməsinin Yerevan bölməsinin binasında keçiriləcək. /News.am/