Dünyanı gözləyən yeni təhlükə – Alimlərdən həyəcan təbili

Dünyanın müxtəlif bölgələrində okeanlar, göllər, çaylar və sahilyanı sular sürətlə oksigen itirir. Alimlər bunun planet üçün ən ciddi ekoloji təhdidlərdən birinə çevrildiyini bildirirlər.

News24.az xəbər verir ki, bu barədə Kaliforniya Universitetinin Skripps Okeanoqrafiya İnstitutunun rəhbərlik etdiyi beynəlxalq tədqiqat qrupunun “Science Daily” nəşrində dərc olunan araşdırmasında qeyd olunub.

Tədqiqatçılar bildirirlər ki, suda oksigenin azalması qlobal istiləşmə, ətraf mühitin çirklənməsi, biomüxtəlifliyin itirilməsi və okeanların turşulaşması ilə sıx əlaqəlidir. Bəzi hallarda bu prosesin təsirləri yüzillərlə davam edə və bir neçə nəslin ömrü boyu geri dönməz ola bilər.

Alimlərin sözlərinə görə, oksigen çatışmazlığının əsas səbəbləri iqlim dəyişikliyi nəticəsində suların isinməsi, kənd təsərrüfatı və məişət tullantıları ilə su hövzələrinə daxil olan qida maddələrinin artması, həmçinin dərin sularda təbii dövranın pozulmasıdır.

Araşdırmada vurğulanır ki, oksigen səviyyəsinin aşağı düşməsi Yerin iqlimini tənzimləyən mühüm bioloji və kimyəvi proseslərə mənfi təsir göstərir. Bu hal mikroskopik orqanizmlərdən tutmuş balıqlara, köpəkbalıqlarına və dəniz məməlilərinə qədər bütün su ekosistemi üçün ciddi təhlükə yaradır.

Mütəxəssislər qeyd edirlər ki, balinalar, delfinlər və suitilər atmosfer havası ilə nəfəs alsalar da, suda oksigenin azalması onların qida bazasını zəiflədir və təbii yaşayış mühitini məhv edir.

Tədqiqat müəllifləri hesab edirlər ki, su hövzələrinin oksigensizləşməsi iqlim dəyişikliyi, çirklənmə və biomüxtəlifliyin itirilməsi ilə yanaşı, planetin əsas ekoloji təhdidləri siyahısına daxil edilməlidir. Onların fikrincə, bu prosesi artıq digər qlobal ekoloji dəyişikliklərdən ayrı qiymətləndirmək mümkün deyil.