Evə qarət etmək istədi, divanın altından tapıldı

Cənubi Afrikada polis qarət etdiyi evdə divanın altında gizlənərək həbsdən yayınacağını düşünən şübhəlini saxlayıb.

News24.az xəbər verir ki, hadisə avqustun 2-si axşam saatlarında Loerisfonteyn şəhərində baş verib.

Patrul xidməti aparan iki polis əməkdaşı yaşayış olmadığı hesab edilən evdə şübhəli hərəkətlilik müşahidə edib.

Onlar evə yaxınlaşarkən içəridən səs eşidiblər, binanın ətrafında isə müxtəlif əşyaların səpələndiyini görüblər. Qapı və pəncərələrin bağlı olduğunu görən polis əməkdaşları dam örtüyünün bir hissəsinin söküldüyünü müəyyən ediblər.

Şübhəlinin evə məhz bu yolla daxil olduğunu ehtimal edərək əlavə qüvvə çağırıblar və ev sahibinin icazəsi ilə damdan içəri giriblər. Baxış zamanı evin qarət edildiyi məlum olub.

Az sonra polis 31 yaşlı şübhəlini divanın altında gizlənmiş vəziyyətdə aşkar edib. O, hadisə yerində saxlanılıb və qanunsuz olaraq evə daxil olma, həmçinin oğurluqda ittiham olunub. Onun məhkəmə qarşısına çıxarılması nəzərdə tutulub.