Gözlənilmədən istefa verdi

İsrailin strateji məsələlər naziri Ron Dermer istefa verib. O, Qəzza müharibəsi zamanı aparılan danışıqlarda əsas rol oynayıb və Baş nazir Benyamin Netanyahuya ən yaxın məsləhətçilərdən biri hesab olunurdu.

News24.az “Reuters”ə istinadla xəbər verir ki, İsrail mediasında bir neçə həftədir davam edən ehtimallar bu gün təsdiqlənib.

Nazir istefasını Netanyahunun adına yazdığı iki səhifəlik məktubla elan edib:
“Strateji məsələlər naziri kimi fəaliyyətimi başa çatdırmaq qərarına gəldiyimi sizə bildirmək istəyirəm”.

Ron Dermer məktubunda qeyd edib ki, 2022-ci ilin dekabrında vəzifəyə gələndə ailəsinə ən çox iki il xidmət edəcəyinə söz verib və bu müddəti iki dəfə uzadıb. Birincisi iyunda İranın nüvə təhlükəsini aradan qaldırmaq üçün, ikincisi isə oktyabrda Qəzzada atəşkəs razılaşması və girovların qaytarılması üçün.

“Ola bilsin, gələcəkdə nə olacağını bilmirəm, amma bir şeyi dəqiq bilirəm: nə etsəm də, yəhudi xalqının gələcəyinin təminatı üçün çalışacağam”, – deyə Dermer vurğulayıb.

Ron Dermer Netanyahunun ən etibar etdiyi müşavirlərdən biri olub. O, həm ABŞ administrasiyası, həm də ərəb ölkələri ilə Qəzza üzrə atəşkəs danışıqlarını aparan əsas fiqurlardan idi.

Dermer 2013–2021-ci illərdə İsrailin ABŞ-dakı səfiri vəzifəsində çalışıb. Onun diplomatik fəaliyyəti Donald Trampın prezidentliyi dövrünə təsadüf edib. Lakin bir çox Demokratlar onun respublikaçılara həddən artıq yaxınlaşdığını və bu davranışın İsrailin Vaşinqtondakı ikipartiyalı münasibətlərinə zərbə vurduğunu hesab edirdilər.

Baş nazirin ofisi məsələ ilə bağlı hələlik açıqlama verməyib.