Hamı sülh istəyir, amma qərarlar dəyişə bilər – Trampdan açıqlama

ABŞ Prezidenti Donald Tramp Rusiyanın Ukraynaya qarşı apardığı müharibə ilə bağlı açıqlama verib.

News24.az xəbər verir ki, Trampın sözlərinə görə, Rusiya müharibənin başa çatmasını istəyir.

“Problem ondadır ki, onlar müharibəni bitirmək istəyəcəklər, sonra isə qəfil fikirlərini dəyişəcəklər”, – o deyib.

ABŞ Prezidenti əlavə edib ki, Ukrayna da müharibənin sona çatmasını istəyir, lakin bu mövqenin də dəyişə biləcəyini istisna etməyib.

“Ukrayna da bunu bitirmək istəyəcək, sonra isə qəfil fikrini dəyişəcək”, – deyə Tramp bildirib.

Tramp Avropa liderləri ilə çox yaxşı bir telefon danışığı apardığını və hazırda sülhün bu zamana qədər olduğundan çox daha yaxın olduğunu vurğulayıb. Bununla belə, o qeyd edib: “Görünür, işlər yaxşı gedir, amma biz bunu artıq çoxdan deyirik”.

Xatırladaq ki, Avropa liderləri Ukraynada sülh danışıqları ilə bağlı birgə bəyanat yayımlayaraq danışıqlarda əhəmiyyətli irəliləyiş əldə olunduğunu açıqlayıblar.