Həyətində 1100 illik xəzinə tapdı

Danimarkada həyətində terras tikən bir sakin təsadüfən ölkədə indiyədək aşkarlanmış Viking dövrünə aid ən böyük gümüş xəzinəni tapıb.

News24.az xəbər verir ki, təxminən 1100 il əvvəl torpağa basdırılan xəzinədə 18,5 kiloqramdan çox gümüş və 700-ə yaxın əşya olduğu bildirilir.

Tapıntı Rebil bələdiyyəsində aşkarlanıb.

Torpaq sahibi iş zamanı qəribə səs eşidərək nəyəsə toxunduğunu hiss edib.

Sonradan bunun Danimarkada Viking dövrünə aid ən böyük gümüş xəzinə olduğu məlum olub.

Xəzinəyə gümüş külçələr, zinət əşyaları, 47 bütöv sikkə və sikkə fraqmentləri, həmçinin Skandinaviya tanrılar panteonuna inamlarla əlaqələndirilən kiçik tor çəkici daxildir. Təxminən 320 əşya gil qabın içində, qalanları isə onun ətrafındakı torpaqda aşkarlanıb.

Tapıntının ölçüsü xüsusilə diqqət çəkir. O, Danimarkada bundan əvvəl aşkarlanmış ən böyük Viking dövrü gümüş xəzinəsindən təxminən üç dəfə böyükdür.

Sikkələr xəzinənin X əsrə aid olduğunu göstərir.

Tapıntı qiymətləndirilməsi üçün Danimarka Milli Muzeyinə təhvil veriləcək.