Üç ildir dağılıb, amma hələ də üstündən maşınlar keçir – VİDEO

Yunanıstanın mərkəzində yerləşən Paleopirqos kəndində üç il əvvəl güclü daşqın nəticəsində zədələnən avtomobil körpüsü hələ də təmir olunmayıb. Buna baxmayaraq, bəzi sürücülər vaxta və yanacağa qənaət etmək üçün təhlükəli keçiddən istifadə etməyə davam edirlər.

News24.az xəbər verir ki, bu barədə “Jalopnik” nəşri məlumat yayıb.

Məlumata görə, körpü 2023-cü il sentyabrın 14-də “Daniel” fırtınasının səbəb olduğu daşqın zamanı çöküb. Körpü tam dağılmasa da, ortasında iri çat əmələ gəlib və konstruksiya suya doğru əyilib.

Bildirilir ki, körpü dörd yerdən zədələnib və o qədər aşağı enib ki, alt hissəsi artıq suya toxunur. Buna baxmayaraq, nə körpü tam bağlanıb, nə də indiyədək əsaslı təmir edilib.

Xüsusilə turistlər üçün vəziyyət daha təhlükəlidir. Hər iki istiqamətdən yaxınlaşarkən körpü zahirən normal göründüyündən, xəbərdarlıq nişanlarının olmaması səbəbindən sürücülər onun qəzalı vəziyyətdə olduğunu yalnız keçidin yarısına çatanda anlayırlar.

Problemi daha da artıran amillərdən biri isə “Google Maps” tətbiqində körpünün hələ də işlək kimi göstərilməsidir. Buna görə də bir çox sürücü marşrutunu məhz bu keçid üzərindən planlaşdırır.

Yayılan videoda bəzi sürücülərin böyük ehtiyatla körpüdən keçdiyi görünür, lakin mütəxəssislər xəbərdarlıq edirlər ki, körpünün tamamilə çökməsi və faciənin baş verməsi yalnız zaman məsələsidir.