Komitə açıqlama yaydı - Nobel Sülh Mükafatı Trampda qala bilərmi?

Nobel Sülh Komitəsi ABŞ Prezidenti Donald Trampa Venesuelanın müxalifət lideri Mariya Korina Maçadonun Nobel Sülh Mükafatı medalını saxlamağa icazə verib.

News24.az xəbər verir ki, komitə "X" platformasında bununla bağlı açıqlama yayıb.

“Medal əldən-ələ keçə bilər, amma Nobel Sülh Mükafatının laureatının adı dəyişmir” - deyə açıqlamada qeyd edilib.

Qeyd edək ki, bir müddət öncə Maçado ABŞ prezidentinə 2025-ci ildə aldığı Nobel Sülh Mükafatını verməyə hazır olduğunu bildirib. O, mükafatı Trampa həsr etdiyini və onun buna layiq olduğunu vurğulayıb. Maçado həmçinin qeyd edib ki, 3 yanvarda Tramp bir çoxlarının qeyri-mümkün hesab etdiyi işi görərək Maduronu Venesuelanın prezidenti vəzifəsindən kənarlaşdırıb.

15 yanvarda Tramp Maçado ilə Ağ Evdə görüşərək Nobel Sülh Mükafatı medalını qəbul edib.