Makron Rusiyanın hədəfində - Həbs edilə bilər
Dünya
Fransa Prezidenti Emmanuel Makron Moskvaya təzyiqin artırılmasına çağırış edib.
News24.az xəbər verir ki, Rusiya hazırda Makronun sözügedən çağırışına mümkün cavab addımlarını müzakirə edir.
Rusiyalı hərbi-siyasi ekspert Aleksandr Perenciyev Fransaya qarşı diplomatik müstəvidən kənara çıxan tədbirlərin görülə biləcəyini iddia edib.
Perenciyevin fikrincə, ilk addım kimi Makrona qarşı cinayət işi açılmalıdır.
Onun sözlərinə görə, bu iş çərçivəsində Fransa prezidentinin səfər etdiyi ölkələrə müvafiq sorğular göndərilə bilər.
Ekspert hesab edir ki, Makron prezident səlahiyyətlərini başa vurduqdan sonra onun saxlanılması cəhdi daha real ola bilər.
Analitik həmçinin, Rusiyanın mümkün hərbi cavabının Fransanın Ukraynadakı fəaliyyətini də əhatə etməli olduğunu bildirib.
O qeyd edib ki, Paris Odessa limanlarına maraq göstərdiyini gizlətmir.
“Düşünürəm ki, məhz bu obyektlər Rusiyanın zərbələrinin hədəfi olmalıdır. Fransaya məxsus istənilən infrastruktur məhv ediləcək”, – deyə Perenciyev iddia edib.
O, Ukrayna ərazisindəki Fransa hərbçilərini də prioritet hədəflər sırasında göstərib.
Bundan başqa, Fransanın Qara dəniz vasitəsilə Ukrayna Silahlı Qüvvələrinə silah və təchizat çatdırılması cəhdlərinin qarşısının qətiyyətlə alınmalı olduğunu bildirib.
Perenciyev əlavə edib ki, Rusiya Fransanı ənənəvi təsir dairələrindən, xüsusilə Afrikadan sıxışdırıb çıxarmağa çalışmalıdır.
O, həmçinin Yeni Kaledoniya kimi ərazilərdə müstəqillik istəyən qüvvələr yaranacağı təqdirdə, onların müstəqilliyinin ən azı tanınmasının nəzərdən keçirilə biləcəyini deyib.
