Milyonluq layihə iflasa uğradı: Türkiyədə yüzlərlə qəsr boş qaldı

Türkiyədə son illərin ən iddialı yaşayış layihələrindən biri hesab olunan "Burj Al Babas" uğursuzluğa düçar olub. "The Mirror" nəşrinin məlumatına görə, yüzlərlə nağıl qəsrinə bənzər lüks villa tikilməsi planlaşdırılsa da, tikintinin başlanmasından 12 il keçməsinə baxmayaraq layihə hələ də tamamlanmayıb.

News24.az xəbər verir ki, layihəyə əsasən, İstanbul yaxınlığında qotik üslubda inşa ediləcək, qüllələri, eyvanları və Disney parklarındakı Zoluşka qəsrini xatırladan fasadları olan 732 üçmərtəbəli villadan ibarət qeyri-adi yaşayış kompleksi salınmalı idi.

Bununla belə, villaların memarlığı nağıl qəsrlərindən deyil, İstanbulun məşhur tarixi abidələri olan Qalata qülləsi və Qız qalasından ilhamlanmışdı. Ərəb dilindən tərcümədə "Babas qülləsi" mənasını verən "Burj Al Babas" adı yaxınlıqdakı Babas termal bulaqları ilə bağlıdır. Hər villaya şəxsi qapalı hovuzların istifadəsi üçün termal su çəkilməsi də planlaşdırılmışdı.

Layihə yalnız villalarla məhdudlaşmırdı. Burada iri ticarət mərkəzi, məscid, kinoteatr və ənənəvi türk hamamının yerləşəcəyi günbəz formalı kompleksin tikintisi də nəzərdə tutulurdu.

Dağlıq ərazinin daha sərin iqliminin yay aylarında xüsusilə Yaxın Şərq ölkələrindən olan varlı alıcıları cəlb edəcəyi düşünülürdü.

Villalar parlaq reklam bukletlərində geniş tanıdılırdı. Hər birinin qiyməti 370-530 min ABŞ dolları arasında dəyişirdi. Tikinti başa çatmamış villaların təxminən yarısı, əsasən Fars körfəzi ölkələrindən olan alıcılara satılmışdı. Lakin heç bir alıcı evinə köçə bilmədi.

2014-cü ildə başlayan və dörd ilə tamamlanması planlaşdırılan tikinti qısa müddət sonra problemlərlə üzləşdi. Əvvəlcə podratçılar tikinti tullantılarının daşınması zamanı ekoloji normaları pozmaqda ittiham olundular. Daha sonra işçilər əməkhaqlarının ödənilməməsinə etiraz etdilər, bir çox podratçı şirkət layihəni tərk edərək borcların ödənilməsi üçün məhkəməyə müraciət etdi.

Vəziyyəti Türkiyədə uğursuz hərbi çevriliş cəhdi, əlverişsiz hava şəraiti və ölkədəki iqtisadi çətinliklər daha da ağırlaşdırdı. Satışlar kəskin azaldı, layihə maliyyəsiz qaldı və tikinti şirkəti sonda müflis olduğunu elan etdi.

Məlumata görə, 2022-ci ilə qədər kompleksdə bir dənə də olsun villa tam başa çatdırılmamışdı. Ərazidə 587 yarımçıq qalmış qəsr illərdir yağış, qar və temperatur dəyişikliklərinin təsiri altında tədricən dağılır.

2024-cü ildə Küveyt əmiri ilə Türkiyə Prezidenti Rəcəb Tayyib Ərdoğan arasında keçirilən görüşdən sonra layihə yenidən gündəmə gəldi. Mətbuatın yazdığına görə, danışıqlarda Burj Al Babas layihəsi də müzakirə olunub.

Həmin il layihəni həyata keçirən Sarot Group şirkətinin nümayəndəsi Adəm Təkgöz tikintinin sərt qış səbəbindən dayandırıldığını, növbəti yay mövsümündə bərpa olunmasının planlaşdırıldığını bildirmişdi.

Lakin 2026-cı ilə olan vəziyyətə görə, tikintinin yenidən başladığını göstərən heç bir əlamət yoxdur. Sarot Group demək olar ki, informasiya məkanından itib və vaxtilə böyük ümidlər vəd edən layihə bu gün də nağıl şəhərciyi əvəzinə nəhəng "xəyalət şəhəri" olaraq qalır.