Qəzzada 950 min insan daşqın təhlükəsi ilə üz-üzədir

Qəzzada təxminən 950 min məcburi köçkün daşqın riski olan ərazilərdə yaşayır, onlardan 400 mininin yüksək təhlükəli zonalarda olduğu bildirilir.

News24.az xəbər verir ki, bu barədə Ümumdünya Səhiyyə Təşkilatının (ÜST) nümayəndəsi Reynhilde Van de Virdt BMT-nin Cenevrə Ofisində keçirilən mətbuat konfransında məlumat verib.

Onun sözlərinə görə, Qəzzanın səhiyyə sistemi imkanlarından artıq yüklənib. Yanacaq və tibbi ləvazimat çatışmazlığı vəziyyəti daha da çətinləşdirir. Yağışlar nəticəsində bir sıra çadırlar su altında qalıb, ailələr isə yeganə sığınacaqlarını itirmək təhlükəsi ilə üzləşiblər.

Van de Virdt bildirib ki, su basmış düşərgələrdə kanalizasiya suları, tullantılar və çirkli su insanların yaşadığı ərazilərlə qarışır. Rütubət və kif xüsusilə uşaqlar arasında tənəffüs yolu xəstəliklərinin yayılması riskini artırır.

Qeyd edilib ki, Qəzzada kəskin respirator infeksiya hallarının sayı ötən ilin eyni dövrü ilə müqayisədə 33 min artıb. Bu hallar qış mövsümü başlamazdan əvvəl ümumi tibbi müayinələrin 11 faizini təşkil edib.

ÜST nümayəndəsi qışın başlaması ilə su yolu ilə yayılan xəstəliklərin riskinin də artacağını vurğulayıb. O, məcburi köçkünlər üçün çadır, plastik örtük, təmiz su və tullantıların idarə olunması vasitələrinə təcili ehtiyac olduğunu bildirib.