Seuta sərhədində miqrant faciəsi - Ölənlərin sayı 90-a çatdı

Mərakeşdən İspaniyanın Seuta eksklavına keçməyə cəhd edən miqrantlar arasında ölənlərin sayı 90-a çatıb.

News24.az xəbər verir ki, bu barədə “Reuters” məlumat yayıb.

İspaniya rəsmilərinin məlumatına görə, hadisə zamanı insanların bir qismi dənizdə boğulub, digərləri isə sərhəd hasarına doğru yaranan sıxlıq və izdiham nəticəsində həyatını itirib.

İspaniya hökuməti sərhəd keçidinin nəzarət altına alındığını, miqrantların böyük hissəsinin isə könüllü şəkildə və ya rəsmi prosedurlar çərçivəsində Mərakeşə geri qaytarıldığını açıqlayıb. Hadisə zamanı Seutaya on minlərlə miqrant daxil olsa da, onların əksəriyyəti artıq eksklavı tərk edib.

Kütləvi keçid cəhdinin sosial şəbəkələrdə sərhədin asanlıqla keçilə biləcəyi barədə yayılan məlumatlardan sonra başladığı bildirilir. Yerli hakimiyyət orqanları isə miqrasiya böhranının şəhərin infrastrukturuna ciddi yük yaratdığını və qəbul mərkəzlərinin imkanlarını aşdığını qeyd edirlər.

Qeyd edək ki, iyulun 30-da Mərakeşin Fenidek sahillərindən minlərlə miqrant İspaniyaya məxsus Seutaya üzərək və ya piyada keçməyə cəhd edib. Bundan sonra İspaniya hökuməti bölgəyə əlavə hərbi qüvvələr göndərərək sərhəd təhlükəsizliyini gücləndirib.