Xalq artistinin evi 6 milyona satışa çıxarıldı

Rusiyanın Xalq artisti Alla Puqaçovanı 10 ildir hər yay kirayəyə götürdüyü Yurmaladakı villadan çıxara bilərlər.

News24.az xəbər verir ki, evin sahibi villanı satışa çıxarıb və istənilən an aylıq 6,2 milyon rubl kirayə ödəyən primadonnadan evi boşaltmasını tələb edə bilər.

Hazırda malikanədə Alla Puqaçova və Maksim Qalkin istirahət edirlər.

Puqaçova əvvəlcə Layma Vaykulenin festivalında iştirak etmək, sonra isə daha bir ay dincəlmək üçün villanın kirayəsinə 6 milyon rubldan çox vəsait xərcləyib.

Məlumata görə, villanı “Parex Bank”ın keçmiş şəriklərindən biri satmaq qərarına gəlib.

Hazırda satışla bağlı danışıqlar davam etdiyi üçün məşhur cütlük hələ də evdə qalır.

Lakin ev sahibi sövdələşməni yaxın vaxtlarda başa çatdırmaq niyyətindədir.

Əvvəlcə villa 10 milyon avroya satışa çıxarılsa da, sonradan qiymət 6 milyon avroya endirilib.

Villa mütəmadi olaraq potensial alıcılara göstərilir və baxış zamanı rieltorun Puqaçovadan müştərini narahat etməmək üçün müvəqqəti olaraq evi tərk etməsini xahiş etmək hüququ var.

Məlumata görə, gələcək alıcı villanı şəxsi istifadəsi üçün almağı planlaşdırır. Bu halda o, evi gələcəkdə Puqaçovaya kirayəyə verməkdən imtina edə bilər.

Bununla belə, Puqaçova villanı tərk etmək istəmir. Ailə artıq uzun illərdir bu məkana öyrəşib. Onlar son 10 ildə hər yay Yurmalaya gəlir və bu müddətdə evin əsas mövsümi kirayəçilərinə çevriliblər.