Dambrauskas həyatının dönüş nöqtəsindən danışdı

“Sabah”ın baş məşqçisi Valdas Dambrauskas UEFA-nın rəsmi saytına danışıb.

News24.az xəbər verir ki, o, həyatındakı dönüş nöqtəsini açıqlayıb.

Litvalı mütəxəssis dönüş nöqtəsinin “Kim milyonçu olmaq istəyir?” yarışmasına qatılması olduğunu deyib:

“Yarışmanın adı “Šeši nuliai – milijonas” idi (Kim milyonçu olmaq istəyir?). Ora özünü sınamaq üçün gedirsən. Qalib gələcəyim, pul qazanıb hansısa yerə səyahət edəcəyim və ya konkret bir iş görəcəyim barədə heç bir planım yox idi. Bu, 2002-ci ilin aprelində baş verdi. Mən yenicə 25 yaşımı tamamlamışdım. İşləyirdim və Şyaulyay Universitetində fəlsəfə və sosial elmləri qiyabi şəkildə öyrənirdim.

4 min lit qazandım – bu, 1000 avrodan bir qədər çox idi. Amma o vaxt 4 min lit mənim üçün 10 aylıq maaş demək idi, çünki aylıq əməkhaqqım 400 lit təşkil edirdi. Müasir dövrdə bu, təxminən 20 min avro qazanmağa bərabər olardı.

Doğrudanmı həmin pulun bir hissəsi elə başlanğıcda məşqçilik təhsili və kurslara xərcləndi? Xeyr, bu, daha çox Hollivud filmlərinə bənzəyir. Vəziyyətin kontekstini başa düşmək lazımdır.

Pul mənə çox kömək etdi. Şyaulyay Universitetində imtahanlarımız may ayının sonunda keçirilirdi. Universitetə gedəndə kimsə dərhal dedi ki, burada yaxşı iş görmüsən, həmin pul iki, yaxud iki il yarımlıq təhsil haqqını ödəyəcək. Əsas məsələ bu idi. Daha sonra xaricə getmək imkanı yarandı. Əlbəttə, qazandığım pulun bir hissəsi hələ ödəməli olduğum təhsil haqqına da getdi.

Plan belə idi. İngiltərəyə necə getmək olar? Əvvəlcə aviabiletlər almalısan. Gediş-dönüş bileti almaq vacib idi. Sonra ingilis dili kursunun pulunu ödəməli və təxminən bir ay qalmağa yer tapmalıydın. Həmçinin hesabında müəyyən qədər pul olduğunu göstərən bank çıxarışına ehtiyacın var idi. Yarışmadan qazandığım pul bu xərclərə getdi.

İndi həyat yoldaşım olan İnqrida (Dambrauskiene) ilə birlikdə səyahət etdiyimi xatırlayıram. Onu dərhal buraxdılar və təxminən beş dəqiqəyə ölkəyə daxil oldu. Mən isə iki saata yaxın orada qaldım. Onlar hər şeyi yoxlayır, kursun həqiqətən mövcud olduğunu və bu şəxsin orada təhsil alacağını təsdiqləmək üçün kolleclə əlaqə saxlayırdılar. İngiltərəyə daxil olmağım xeyli uzun çəkdi. Amma sonda hər şey yaxşı nəticələndi”.