Mbappenin yaxın ətrafında maliyyə qalmaqalı: “Momo” ilə bağlı ağır ittihamlar

Fransa millisinin və “Real Madrid”in ulduzu Kilian Mbappenin uzun illər güvəndiyi təhlükəsizlik rəhbəri Məhəmməd Sanhadji barədə ciddi ittihamlar irəli sürülüb. “L’Equipe”nin araşdırmasına görə, Sanhadji çirkli pulların yuyulması, vergidən yayınma, rüşvət, dələduzluq və təsirdən sui-istifadə ilə bağlı istintaqa cəlb olunub.

News24.az xəbər verir ki, 2004-cü ildən polis sistemində çalışan və milli komanda futbolçuları tərəfindən “Momo” adlandırılan Sanhadji barəsində sentyabrın 16-da rəsmi ittiham irəli sürülüb. Məhkəmə onun 80 min avro girov ödəməsinə, hazırkı və keçmiş futbolçular, məşqçilər və rəhbərlərlə əlaqə saxlamasına, həmçinin idman sahəsində peşə fəaliyyəti ilə məşğul olmasına məhdudiyyət qoyub. Onun “Clairefontaine” məşq mərkəzi, “Stade de France” və “Parc des Princes” stadionlarına səfərləri də icazə ilə mümkün olacaq.

İstintaq Paris Prokurorluğunun 2024-cü ilin yayında dövlət maliyyə araşdırma qurumu “Tracfin”dən aldığı məlumatlardan sonra başlayıb. Hüquq-mühafizə orqanları milli komanda futbolçularının Sanhadjiyə etdiyi ödənişlərin adi hədiyyə və ianə, yoxsa gizli şəkildə göstərilən təhlükəsizlik xidmətlərinin haqqı olub-olmadığını araşdırır.

Araşdırmaya görə, Mbappe Sanhadjiyə ümumilikdə 180 min 300 avro ödəyib. Bunun 60 min 300 avrosu 2023-cü ilin iyununda futbolçunun dünya çempionatındakı bonuslarından təhlükəsizlik əməkdaşlarına ayırdığı məbləğ olub. Digər üç əməkdaşın hər birinə isə 30 min avro verilib.

Bundan başqa, Mbappenin anası və meneceri Fayza Lamari vasitəsilə Sanhadjiyə ev almaq üçün 120 min avro kredit də verildiyi bildirilir. Mbappenin yaxın ətrafı bu məbləğin qarşılıqsız şəkildə göstərilən xidmətlərə görə təşəkkür məqsədi daşıdığını bildirib. Mbappenin özünə qarşı hər hansı ittiham irəli sürülməyib.

İstintaq materiallarında 2020-2024-cü illər arasında təxminən 15 hazırkı və keçmiş milli komanda üzvündən Sanhadjiyə ümumilikdə 300 min avrodan çox pul köçürüldüyü, həmçinin onun üçün istirahət səfərlərinin və digər üstünlüklərin təşkil edildiyi qeyd olunur.

Sanhadjinin Fransa millisindəki təsiri də diqqət çəkib. O, uzun illər komandanın daxilində əsas əlaqələndirici şəxslərdən biri olub və hətta 2026-cı il dünya çempionatı üçün də heyətdə saxlanılması ilə bağlı futbolçular və Zinəddin Zidanın dəstəyini aldığı bildirilib. Bununla belə, Fransa Futbol Federasiyası Sanhadji ilə bağlı araşdırma çərçivəsində işə mülki tərəf kimi qoşulub.

İttihamların məhkəmə tərəfindən yekun təsdiqlənmədiyini və Sanhadjinin təqsirsizlik prezumpsiyasının qüvvədə olduğunu da qeyd etmək lazımdır.