Messi Ronaldonun rekorduna yaxınlaşır

Fransanın France Football jurnalı ABŞ-ın “İnter Mayami” klubunda çıxış edən argentinalı hücumçu Lionel Messini 2025/26 mövsümünün ən yaxşı futbolçusuna verilən “Qızıl top” mükafatına namizədlər siyahısına daxil edib.

News24.az xəbər verir ki, bu barədə mükafatın mətbuat xidməti məlumat yayıb.

Messi ötən mövsüm Şimali Amerikanın əsas futbol liqası MLS-in qalibi olub və ardıcıl ikinci dəfə turnirin ən yaxşı futbolçusu seçilib. O, 49 matçda 43 qol vurub və 26 məhsuldar ötürmə edib.

Argentina millisinin heyətində Messi dünya çempionatının finalına qədər irəliləyib. Finalda Argentina İspaniyaya əlavə vaxtda 0:1 hesabı ilə məğlub olub. Dünya çempionatı ərzində hücumçunun hesabında 8 qol və 4 məhsuldar ötürmə olub. Turnirdən sonra Messi Argentina millisində çıxışını başa vurub.

Messi “Qızıl top”a namizədliklərin sayına görə ikinci yerdədir – 17 nominasiya. Bu göstəricidə onu yalnız portuqaliyalı Kriştiano Ronaldo qabaqlayır – 18 nominasiya. Bununla belə, argentinalı futbolçu 8 “Qızıl top”la mükafat tarixinin rekordçusudur.

39 yaşlı Messi 2023-cü ildən “İnter Mayami”də çıxış edir. Avropada o, Fransanın PSJ və İspaniyanın “Barselona” klublarında oynayıb. “Barselona”nın heyətində Messi dörd dəfə Çempionlar Liqasının, üç dəfə UEFA Super Kubokunun və üç dəfə klublararası dünya çempionatının qalibi olub.

Hücumçu 2022-ci ildə dünya çempionu, 2014 və 2026-cı illərdə dünya çempionatının gümüş medalçısı, 2008-ci ildə olimpiya çempionu, 2021 və 2024-cü illərdə isə Amerika Kubokunun qalibi olub.

Messi Argentina millisində 207 oyun keçirib və 125 qol vurub. O, hər iki göstərici üzrə milli komandanın rekordçusudur. Futbolçu karyerası ərzində altı dünya çempionatında iştirak edib.

“Qızıl top” mükafatının təqdimetmə mərasimi 26 oktyabrda Londonda keçiriləcək. Bu, mərasimin ilk dəfə Parisdən kənarda təşkil olunması olacaq.