Elektrik enerjisinin kəsilməsi yanğınlara səbəb oldu - FOTO

Gecə saatlarında ölkə üzrə elektrikin verilişində fasilənin yaranması yanğınlara səbəb olub. 

Belə ki, Bakı şəhərinin Xətai rayonunda ümumi sahəsi 100 m² olan birmərtəbəli 3 otaqlı evin mətbəxinin yanar konstruksiyaları 17 m² sahədə və 1 otağın dam örtüyü 15 m² sahədə yanmışdır. Evin qalan hissəsi və bitişik evlər yanğından mühafizə olunub. Yanğın yanğın bölmələri tərəfindən söndürülüb.

Daha bir yanğın hadisəsi isə Bakı şəhərinin Yasamal rayonunda qeydə alınıb. Ümumi sahəsi 100 m² olan 3 otaqdan ibarət tikilinin içərisində işıq generatoru yanıb.

Tikili yanğından mühafizə olunub. Yanğın yanğın bölmələri tərəfindən söndürülüb.

28 May küçəsi 5 ünvanında yerləşən binada da yanğın hadisəsi qeydə alınıb. Abiturient kursunun fəaliyyət göstərdiyi mərkəzdə qısaqapanma nəticəsində konsdisioner yanıb. Ofisdə heç kimin olmamasına görə FHN-nin əməkdaşları içəri pəncərədən daxil olub. 

Teymur Məmmədov

FOTO: Nurlan Gülməmmədov