Şəhid qardaşının həyat yoldaşını boğub öldürən şəxsin məhkəməsi başladı

Sumqayıt Ağır Cinayətlər Məhkəməsində Xızıda qardaşının arvadını boğub öldürməkdə təqsirləndirilən Taleh Qurbanovun məhkəmə prosesi başlayıb. 

News24.az-ın məlumatına görə, hakim Hafis Əliyevin sədrliyi ilə keçirilən prosesdə ittiham aktı oxunub. Təqsirləndirilən T. Qurbanov özünü ittihamlarda təqsirli bilib. 

Proses oktyabrın 25-də davam etdiriləcək. 

Qeyd edək ki, qətlə yetriilən Ləman Qurbanova 2020-ci ilin sentyabr ayında Ermənistanın təxribatının qarşısını alarkən şəhid olmuş kapitan Saleh Qurbanovun həyat yoldaşıdır. Ləman Qurbanovanı öldürməkdə təqsirləndirilən Taleh Qurbanov şəhidin qardaşıdır.

Hadisə mayın 13-ü saat 18 radələrində Xızı rayonu, Giləzi qəsəbəsində yerləşən fərdi yaşayış evlində qeydə alınıb.

Həmin gün 1999-cu il təvəllüdlü Ləman Qurbanovanın ölməsinə dair rayon prokurorluğuna məlumat daxil olub.

Aparılmış araşdırmalarla 1984-cü il təvəllüdlü Taleh Qurbanovun qohumu Ləman Qurbanovanı boğaraq qəsdən öldürməsinə əsaslı şübhələr müəyyən edilib.

Faktla bağlı Xızı rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. İş üzrə şübhəli şəxs qismində saxlanılan Taleh Qurbanov hadisədən sonra könüllü olaraq istintaqa təslim olub.

Qeyd edək ki, qətlə yetirilən qadının 1 övladı olub.

Samir Əli