Bu problemdən xilas olmaq istəyirsinizsə, ayaqqabılarınızı soyuducuya qoyun

İdman ayaqqabıları artıq yalnız idman zamanı istifadə edilmir. Onlardan gündəlik həyatda, işdə, səfərlərdə, gəzintilərdə və müxtəlif tədbirlərdə də istifadə olunur. Lakin uzun müddət geyinilən ayaqqabılarda yaranan nəmlik bakteriya və göbələklərin çoxalmasına, nəticədə isə xoşagəlməz qoxunun yaranmasına səbəb ola bilər.

News24.az xəbər verir ki, ayaqqabıları tez-tez yumaq isə bütün materiallar üçün uyğun deyil. Xüsusilə keyfiyyətli və bahalı modellərin yuyulması onların formasına və materialına zərər verə bilər.

Xoşagəlməz qoxudan xilas olmaq üçün maraqlı üsullardan biri isə idman ayaqqabılarını dondurucuda saxlamaqdır.

Bəs soyuq bu problemin həllinə necə kömək edir?

Ayaqlarda çoxlu sayda tər vəzisi yerləşir. Tərin özü qoxusuz olsa da, yaranan nəmlik bakteriya və göbələklərin inkişafı üçün əlverişli mühit yaradır. Bu mikroorqanizmlər tər və dəri hissəciklərini parçalayaraq xoşagəlməz qoxuya səbəb olan maddələr əmələ gətirir.

Aşağı temperatur isə mikroorqanizmlərin fəaliyyətini zəiflədir və onların bir hissəsinin məhv olmasına səbəb olur. Dondurmaq ayaqqabını tam steril vəziyyətə gətirməsə də, qoxuya səbəb olan mikroorqanizmlərin miqdarını azaltmağa kömək edə bilər.