Bu qadın milyonçu sevgili tapmağa kömək edir

Hollivudun ən varlı və məşhur müştəriləri ilə işləyən peşəkar evlənmə vasitəçisi Susan Trombetti elit tanışlıq dünyasının qapalı tərəfinə işıq salıb.

News24.az xəbər verir ki, Trombetti bu dünyada sevginin çox vaxt hisslərlə deyil, şərtlər, müqavilələr və ciddi məxfiliklə başladığını bildirib.

O, xidmətlərinə görə 350 min dollardan çox qazandığını, məşhurlara, idmançılara, şirkət rəhbərlərinə və nüfuzlu şəxslərə sevgili tapmağa kömək etdiyini açıqlayıb.

Trombettiyə görə, onun işi kadr seçimi mütəxəssisi kimidir, sadəcə burada işçi deyil, münasibət üçün insan seçilir.

“Bu, iş üçün kadr seçiminə bənzəyir, sadəcə söhbət sevgidən gedir,” - deyə o vurğulayıb.

Onun bazasında on minlərlə potensial namizəd var və ilk addım həmişə müştərinin dərin psixoloji və həyat anketinin doldurulması ilə başlayır. Bir çox insan isə, onun sözlərinə görə, nə istədiyini düzgün ifadə edə bilmir.

“Ən ağıllı və uğurlu insanlardan bəziləri əslində nə istədiklərini bilmirlər,” - deyə o bildirib.

O, xüsusilə məşhurlar arasında tez-tez “səthi” tələblərlə qarşılaşdığını deyib. Ən çox rast gəlinən istəklər arasında, boyun 180 sm-dən hündür, ən azı 10 milyon dollar sərvəti, effektli görünüş, eyni həyat tərzi, yüksək cazibədarlıq səviyyəsi yer alır.

Lakin Trombetti vurğulayıb ki, onun işi müştərilərə istəklərlə real ehtiyaclar arasındakı fərqi anlamaqda kömək etməkdir.

Onun sözlərinə görə, bəzi tələblər real deyil: “Boyu 180 sm-dən yuxarı olan kişilər yalnız 12–13 faizdir. Biz insanlara bunu anlamağa kömək edirik”. /Daily Mail/