Kirpilər ölümə səbəb ola bilər - Həkimdən xəbərdarlıq

Kirpilər çox vaxt zərərsiz və mehriban heyvanlar kimi görünsələr də, bəzi təhlükəli infeksiyaların daşıyıcısı ola bilərlər.

News24.az xəbər verir ki, rusiyalı infeksionist həkim Yelizaveta Polomoşnovanın sözlərinə görə, kirpilərin dişləmələri və tikanlarının batması ciddi təhlükə yarada bilər.

Belə yaralar adətən kiçik görünür, lakin dərin olur və bakteriyaların toxumalara daxil olmasına şərait yaradır.

Həkim xüsusilə quduzluq, tetanus və tularemiya riskinə diqqət çəkib.

Quduzluq vəhşi məməlilərlə təmas zamanı ən təhlükəli infeksiyalardan biridir.

Kirpi dişlədikdə və ya heyvanın tüpürcəyi zədələnmiş dəriyə düşdükdə dərhal tibbi yardım almaq lazımdır.

Tetanus isə torpaqla çirklənmiş dərin yaralardan sonra inkişaf edə bilər.

Kirpinin tikanları və pəncələri torpaq və bakteriyaların yaraya keçməsinə səbəb ola bilər.

Digər təhlükəli xəstəlik tularemiyadır. Bu infeksiya xəstə heyvanlarla təmas zamanı insana keçə və müalicə edilmədikdə pnevmoniya, meningit və oynaqların zədələnməsi kimi ağır fəsadlara səbəb ola bilər.

Həkim həmçinin kirpilərin üzərində gənələrin ola biləcəyini bildirib.

Bu gənələr gənə ensefaliti, Laym xəstəliyi, anaplazmoz və erliхioz kimi infeksiyaları daşıya bilər.

Bundan başqa, kirpilərlə təmas zamanı dəri göbələyi və birələr vasitəsilə yayılan infeksiyalara yoluxmaq mümkündür.

Mütəxəssis kirpi tərəfindən dişlənmə və ya tikan batması halında yaranı 10–15 dəqiqə ərzində sabun və su ilə yumağı, daha sonra antiseptiklə təmizləyib təmiz sarğı qoymağı və mümkün qədər tez travmatoloqa müraciət etməyi tövsiyə edib.

Həkim yaranı sıxmağı və ya yandırmağı məsləhət görmür.