Növbəti Günəş tutulması nə zaman olacaq?

12 avqustda Avropanın bir sıra ölkələrindən Günəş tutulmasını izləmək üçün İspaniya, İslandiya, Qrenlandiya və Portuqaliyanın bəzi bölgələrinə səyahət edənlər olub, lakin nadir səma hadisəsini izləyə bilməyənlər üçün daha möhtəşəm bir tutulma artıq gələn il baş verəcək.

News24.az xəbər verir ki, 2027-ci il avqustun 2-də tam Günəş tutulması müşahidə olunacaq. Hadisə İspaniyanın cənubundan başlayaraq Şimali Afrika və Yaxın Şərqin bir sıra ərazilərini əhatə edəcək.

Tutulmanın tam fazası İspaniya, Cəbəllütariq, Mərakeş, Əlcəzair, Tunis, Liviya, Misir, Səudiyyə Ərəbistanı, Yəmən və Somalidə müşahidə edilə biləcək. Kadis, Tanjer, Cəbəllütariq, Benqazi, Luksor və Ciddə tam tutulma zonasına düşəcək.

Mütəxəssislərin hesablamalarına görə, ən uzun tam tutulma Misirin Luksor şəhərində müşahidə ediləcək. Burada Günəşin tam tutulması təxminən 6 dəqiqə 22 saniyə davam edə bilər.

Səudiyyə Ərəbistanının bəzi cənub bölgələrində, o cümlədən Abhada tam qaranlığın təxminən 6 dəqiqə, Ciddə və ölkənin qərb sahillərinin bəzi hissələrində isə 5 dəqiqə 50 saniyə davam edəcəyi gözlənilir.

Tam Günəş tutulması Ayın Yer ilə Günəş arasından keçərək Günəşin diskini tamamilə örtməsi zamanı baş verir. Mütəxəssislər tutulmanı müşahidə edərkən təhlükəsizlik qaydalarına ciddi əməl etməyin vacibliyini vurğulayırlar. Günəşə xüsusi qoruyucu eynək olmadan birbaşa baxmaq gözlər üçün ciddi təhlükə yarada bilər.

2027-ci ildə baş verəcək tutulmanın XXI əsrin ən uzun tam Günəş tutulmalarından biri olacağı gözlənilir. (The Independent)