Atmağa tələsməyin: Bu tumlar sağlamlıq üçün çox faydalıdır

Bir çox insan meyvələrin tumlarını və çəyirdəklərini düşünmədən tullayır. Halbuki onların bəziləri orqanizm üçün faydalı hesab olunsa da, digərlərinin qəbulu sağlamlıq üçün risk yarada bilər.

News24.az xəbər verir ki, mütəxəssislərin sözlərinə görə, çiyələk, moruq, nar, kivi və marakuyanın xırda tumlarını rahatlıqla yemək olar. Bu tumlar lif və antioksidantlarla zəngindir, hüceyrələrin zədələnməsinin qarşısını almağa kömək edir.

Üzüm tumları da faydalı hesab olunur. Onların tərkibində ürək-damar sistemi və immunitet üçün faydalı olan polifenollar mövcuddur. Məhz buna görə üzüm tumu ekstraktından qida sənayesində və bəzi bioloji fəal qida əlavələrinin hazırlanmasında istifadə edilir.

Qovun və balqabaq tumları isə maqnezium, dəmir, sink, E vitamini və faydalı doymamış yağlarla zəngindir. Xüsusilə balqabaq tumları sağlam qəlyanaltı kimi tövsiyə olunur.

Bununla yanaşı, bəzi meyvələrin tumlarına qarşı ehtiyatlı olmaq lazımdır. Ərik, şaftalı, albalı, gavalı və manqo çəyirdəklərində amiqdalin maddəsi olur. Bu maddə orqanizmdə parçalanaraq zəhərli sianid turşusuna çevrilə bilər. Böyük miqdarda qəbul edildikdə ürəkbulanma, qıcolma, nəfəsalma çətinliyi və digər təhlükəli əlamətlər yarada bilər.

Mütəxəssislər bildirirlər ki, böyüklər gün ərzində ərik tumunu çox miqdarda qəbul etməməli, uşaqlara və ev heyvanlarına isə ümumiyyətlə verilməməlidir.

Alma və armud tumlarında da amiqdalin mövcuddur. Təsadüfən bir neçə bütöv tum udmaq adətən təhlükəli sayılmasa da, onlar əzilərək, məsələn, smuzi hazırlanarkən istifadə edildikdə amiqdalin daha asan ayrılır. Bu səbəbdən alma və armud tumlarının mütəmadi olaraq əzilmiş formada qəbul edilməsi məsləhət görülmür.