Az yatmaq piylənməyə səbəb olur – Alimlərdən xəbərdarlıq

Yuxunun hər gecə təxminən 80 dəqiqə azalması qısa müddətdə çəki artımına və fiziki aktivliyin azalmasına səbəb ola bilər.

News24.az xəbər verir ki, bu barədə "Discover" nəşri "Annals of Internal Medicine" jurnalında dərc olunan araşdırmaya istinadən məlumat yayıb.

Araşdırmada 95 sağlam yetkin iştirak edib. Onlardan 6 həftə ərzində adi yuxu rejimini 90 dəqiqə gecikdirmələri istənilib ki, bu da gecəlik orta hesabla 80 dəqiqə az yatmaları ilə nəticələnib.

Nəticələr göstərib ki, az yatan iştirakçılar orta hesabla təxminən 0,5 kiloqram çəki alıblar. Eyni zamanda onların gündəlik oturaq keçirdiyi vaxt orta hesabla 17 dəqiqə, menopauzadan sonrakı qadınlar və kişilər arasında isə 30 dəqiqəyədək artıb.

Tədqiqatın müəllifləri bildiriblər ki, hər kəsdə eyni nəticə müşahidə olunmasa da, davamlı yuxu çatışmazlığı zamanla çəki artımı, fiziki aktivliyin azalması, piylənmə, ürək-damar xəstəlikləri və diabet riskini yüksəldə bilər.

Mütəxəssislər vurğulayırlar ki, sağlam çəki və ümumi sağlamlığı qorumaq üçün kifayət qədər yatmaq düzgün qidalanma və fiziki aktivlik qədər vacibdir.