Balqabaq, yoxsa günəbaxan tumu: hansı daha faydalıdır?

Balqabaq və günəbaxan tumları zülal, faydalı yağlar, vitamin və minerallarla zəngin qidalar hesab olunur. Lakin onların qida dəyəri fərqlidir və seçim orqanizmin hansı maddələrə daha çox ehtiyac duymasından asılıdır.

News24.az xəbər verir ki, "Verywell Health" nəşrinin məlumatına görə, 28 qram qabığı təmizlənmiş balqabaq tumunda 163 kalori, 8 qram zülal və 156 mq maqnezium olduğu halda, eyni miqdarda günəbaxan tumunda 165 kalori, 5,5 qram zülal və 36,6 mq maqnezium var.

Mütəxəssislər bildirirlər ki, balqabaq tumu zülal və maqnezium baxımından daha zəngindir. Bu maddələr əzələlərin bərpasına, sinir sisteminin fəaliyyətinə, ürək sağlamlığına və qan şəkərinin tənzimlənməsinə müsbət təsir göstərir.

Günəbaxan tumu isə lif baxımından üstünlük təşkil edir. Lif həzmi yaxşılaşdırır, bağırsaq fəaliyyətini dəstəkləyir, "pis" xolesterinin səviyyəsini azaltmağa və toxluq hissini daha uzun müddət saxlamağa kömək edir.

Mütəxəssislər hər iki növ tumun yulaf sıyığına, yoqurda, salatlara və digər yeməklərə əlavə edilə biləcəyini bildirirlər. Bununla yanaşı, lif qəbulunun tədricən artırılması tövsiyə olunur. Əks halda köp, qaz və ishal kimi həzm problemləri yarana bilər.