Canlı toxumaları yeyən parazit yenidən peyda oldu - Təhlükə

ABŞ-də canlı toxumaları yeyən təhlükəli ət paraziti yenidən aşkar edilib.

News24.az xarici KİV-ə istinadən xəbər verir ki, ABŞ Kənd Təsərrüfatı Nazirliyi məlumat yayıb.

Nazirlik ABŞ ərazisində yeni dünya vint qurdunun (New World screwworm) ilk dəfə qeydə alındığını təsdiqləyib.

Təhlükəli parazit Texas ştatında üç həftəlik buzovda aşkarlanıb.

Bu parazitin sürfələri heyvanların açıq yaralarına yerləşərək canlı toxumaları yeməyə başlayır, zədələnmə sahəsini getdikcə genişləndirir və ağır infeksiyalara səbəb olur.

Parazit iribuynuzlu mal-qara, ev heyvanları, vəhşi təbiət nümayəndələri və nadir hallarda hətta insanlar üçün də təhlükə yaradır.

Yoluxmuş buzov aşkar edildikdən sonra hakimiyyət orqanları dərhal 20 kilometrlik ərazidə karantin tətbiq edib, müşahidəni gücləndirib və zərərvericinin yayılmasının qarşısını almaq üçün milyonlarla steril milçək buraxmağa başlayıb.

Mütəxəssislərin sözlərinə görə, ABŞ daha əvvəl bu paraziti tamamilə məhv etməyə nail olmuşdu və indi də həmin uğuru təkrarlamağı planlaşdırır.

Region sakinlərinə heyvanları qeyri-adi yaralar, sürfələr və ya yoluxma əlamətləri baxımından diqqətlə yoxlamaq tövsiyə olunub.

Bununla yanaşı, rəsmilər vurğulayırlar ki, istehlakçılar üçün heç bir təhlükə yoxdur.