Gecə 6 saatdan az yatanların diqqətinə! - Risk var

Yuxu pozğunluqları insan sağlamlığına mənfi təsir göstərməklə yanaşı, ürək-damar xəstəlikləri riskini də artıra bilər. Xüsusilə gecə yuxusunun tez-tez bölünməsi, kifayət qədər yatmamaq və xoruldama orqanizmin bərpa prosesinə mane olur.

News24.az xəbər verir ki, araşdırmalara görə, gecə 6 saatdan az yatan insanlarda ürək-damar xəstəlikləri riski 7-8 saat yatanlarla müqayisədə 48 faiz daha yüksək ola bilər.

Yuxu zamanı ürək döyüntüləri və qan təzyiqi azalır, orqanizmdə bərpa prosesləri aktivləşir. Eyni zamanda, stress hormonu kortizolun səviyyəsi aşağı düşür və qan damarlarının daxili qatının bərpası üçün şərait yaranır. Bu proseslər ürəyin yükünü azaldır.

Lakin yuxunun tez-tez pozulması stress hormonlarının səviyyəsinin yüksəlməsinə, ürək döyüntülərinin sürətlənməsinə və qan təzyiqinin artmasına səbəb ola bilər. Nəticədə hipertoniya, infarkt və insult riski yüksələ bilər. Yuxu pozğunluqları həmçinin qan damarlarında iltihabi proseslərə və ateroskleroz riskinin artmasına şərait yarada bilər.

Yuxunun keyfiyyətinin aşağı düşməsi insulinə həssaslığın azalması ilə də əlaqələndirilir. Bu hal metabolik sindromun yaranması və ürək-damar sağlamlığının pisləşməsi riskini artıra bilər.

Yuxu rejiminin pozulmasına narahatlıq, həddindən artıq yorğunluq, xroniki ağrılar və xoruldama kimi müxtəlif amillər səbəb ola bilər.

SM-Klinikasının otolarinqoloqu Aleksandr Razvozjayevin sözlərinə görə, xoruldama udlağın yumşaq toxumalarının titrəməsi nəticəsində yaranan səsdir. Yuxu zamanı yumşaq damaq və udlaq əzələlərinin boşalması tənəffüs yollarının daralmasına, havanın həmin nahiyədən keçərkən toxumaları titrətməsinə səbəb olur.

Xoruldama soyuqdəymə və allergik rinit zamanı müvəqqəti yarana, yaxud həftədə ən azı üç dəfə təkrarlanan davamlı problemə çevrilə bilər.