Hər gün pomidor yesəniz, bədəninizdə nə baş verər?

Pomidor mövsümünün gəlməsi ilə bir çox insan bu tərəvəzi gündəlik qida rasionuna daha çox daxil edir. Mütəxəssislərin fikrincə, pomidorun hər gün istehlakı orqanizm üçün bir sıra faydalar versə də, bəzi insanlar üçün müəyyən narahatlıqlara səbəb ola bilər.

News24.az “Real Simple” nəşrinə istinadla xəbər verir ki, pomidor C vitamini, kalium, fol turşusu və K vitamini ilə zəngindir. Onun tərkibindəki likopin adlı antioksidant isə pomidora qırmızı rəng verən əsas maddə olmaqla yanaşı, sağlamlıq üçün mühüm əhəmiyyət daşıyır.

Mütəxəssislər bildirirlər ki, likopin orqanizmdə oksidləşdirici stressin azalmasına kömək edir, ürək-damar sistemini qoruyur və xroniki xəstəliklərin yaranma riskini azaltmağa dəstək verir.

Pomidorun tərkibində olan beta-karotin və xlorogen turşusu kimi digər antioksidantlar da immun sisteminin güclənməsinə, göz sağlamlığının qorunmasına, qan şəkərinin tənzimlənməsinə və qan təzyiqinin sabitləşməsinə müsbət təsir göstərə bilər.

Araşdırmalara görə, pomidorun müntəzəm istehlakı bağırsaq mikroflorasını zənginləşdirərək həzm sisteminin fəaliyyətini yaxşılaşdıra bilər. Ümumilikdə bu tərəvəz ürək, immunitet sistemi, maddələr mübadiləsi və bağırsaq sağlamlığı üçün faydalı hesab olunur.

Mütəxəssislər qeyd edirlər ki, hər gün pomidor yemək ürək sağlamlığını dəstəkləyə, iltihabi prosesləri azalda və orqanizmin müdafiə mexanizmlərini gücləndirə bilər.

Bununla belə, pomidorun turşuluq səviyyəsi yüksək olduğundan bəzi insanlar ehtiyatlı olmalıdır. Xüsusilə mədə yanması və ya qastroezofageal reflüks xəstəliyindən əziyyət çəkən şəxslərdə pomidorun tez-tez istifadəsi narahatlıqları artıra bilər.

Mütəxəssislər belə hallarda pomidorun miqdarını azaltmağı və onun çiy və ya bişmiş formada qəbulunun orqanizmə təsirini müşahidə etməyi tövsiyə edirlər. Bu, məhsulun hansı formada daha yaxşı həzm olunduğunu müəyyən etməyə kömək edə bilər.