Hovuza getmək üçün daha bir səbəb – Həkimlər tövsiyə edir

Mütəxəssislər ürək sağlamlığını qorumaq üçün ən faydalı fiziki fəaliyyət növlərindən birinin üzgüçülük olduğunu bildirirlər.

News24.az xəbər verir ki, "Onet Kobieta" nəşrinin yazdığına görə, üzgüçülük bütün bədəni işlədən aerob məşqdir və qan dövranını yaxşılaşdırmaqla yanaşı, ürək, ağciyər və əzələlərin fəaliyyətinə də müsbət təsir göstərir.

Həkimlərin sözlərinə görə, üzgüçülük oynaqlara az yük düşməsi ilə seçilir. Suyun qaldırıcı qüvvəsi zədə riskini azaldır, eyni zamanda ürək-damar sisteminin fəaliyyətini effektiv şəkildə dəstəkləyir.

Mütəxəssislər qeyd edirlər ki, müntəzəm üzgüçülük xolesterinin səviyyəsinin yaxşılaşmasına, arterial təzyiqin aşağı düşməsinə və ürək xəstəlikləri riskinin azalmasına kömək edir.

Araşdırmalara əsasən, müntəzəm üzən insanlarda ürək xəstəlikləri və ya insultdan ölüm riski bu idman növü ilə məşğul olmayanlarla müqayisədə 41 faiz daha aşağıdır. Bundan əlavə, həkim nəzarəti altında üzgüçülük ürək xəstəliyindən sonra bərpa dövründə olan şəxslər üçün də faydalı hesab olunur.