İmmuniteti gücləndirən, ürəyi qoruyan 7 giləmeyvə

Bütün giləmeyvələr sağlamlıq üçün faydalıdır, lakin bəziləri tərkibindəki vitaminlər, lif və antioksidantların yüksək miqdarına görə digərlərindən daha çox seçilir. Alimlər bildirirlər ki, giləmeyvələr ürək, bağırsaq və beyin sağlamlığının qorunmasına mühüm töhfə verir.

News24.az xəbər verir ki, dietoloqlar ən faydalı giləmeyvələrin reytinqini hazırlayıb və hansılarının hər gün, hansılarının isə daha tez-tez rasiona daxil edilməsinin məqsədəuyğun olduğunu açıqlayıblar.

Fizalis (qızıl giləmeyvə)

Həm təzə, həm də qurudulmuş halda tövsiyə olunur. Fizalis turşməzə dadı və yüngül tropik ətri ilə seçilir, həmçinin bir çox giləmeyvədən daha az şəkər ehtiva edir. Tərkibində lif, C vitamini və antioksidantlar var. Bir porsiya qurudulmuş fizalisdə təxminən 6 qram lif və 9 qram şəkər olur. Onu ayrıca qəlyanaltı kimi yemək, salatlara və quru meyvə qarışıqlarına əlavə etmək mümkündür.

Qoji giləmeyvəsi

Təzə qoji giləmeyvəsinə nadir hallarda rast gəlinsə də, qurudulmuş forması bir çox mağazada satılır. Qoji həm dadına, həm də faydasına görə seçilir. O, antioksidantlar, lif və digər quru meyvələrlə müqayisədə daha çox bitki mənşəli zülal ehtiva edir. Araşdırmalar göstərir ki, qoji immun sistemini gücləndirə, "pis" xolesterinin səviyyəsini azalda və yaşla bağlı sarı ləkə degenerasiyası riskini aşağı sala bilər. Mütəxəssislərin fikrincə, həm qadınlar, həm də kişilər üçün ən faydalı giləmeyvələrdən biri məhz qojidir.

Çiyələk

Botaniki baxımdan həqiqi giləmeyvə hesab edilməsə də, faydalı xüsusiyyətlərinə görə çiyələk bu siyahıda ön sıralardadır. Bir stəkan çiyələk orqanizmin gündəlik C vitamini ehtiyacının 94 faizini qarşılayır və bu göstərici portağaldan da yüksəkdir. C vitamini immuniteti gücləndirir, ürək sağlamlığını dəstəkləyir, kollagenin sintezinə kömək edir və iltihabla mübarizə aparır. Çiyələk həmçinin bağırsaq və ürək sağlamlığı üçün faydalı olan polifenollar və təxminən 3 qram lif ehtiva edir.

Zoğal

Zoğal əsasən sidik yollarının sağlamlığına müsbət təsiri ilə tanınır. Zoğalda olan A tipli proantosianidinlər bəzi bakteriyaların sidik yollarına yapışmasının qarşısını alır və infeksiya riskini azaldır. Bundan əlavə, zoğal ürək sağlamlığını yaxşılaşdırmağa, iltihabı azaltmağa və piylənmə riskini aşağı salmağa kömək edə bilər. Bir stəkan zoğalda cəmi 4 qram şəkər var.

Böyürtkən

Tünd rəngi böyürtkənin antioksidantlarla zəngin olduğunu göstərir. Bu maddələr orqanizmdə oksidləşdirici stressi və iltihabı azaldır. Araşdırmalar göstərir ki, tərkibindəki antosianlar, kversetin və kofein turşusu beyin sağlamlığını dəstəkləyə və yaşlanma prosesində onu qoruya bilər. Böyürtkəni sıyıqlara, salatlara, desertlərə əlavə etmək və ya sous hazırlanmasında istifadə etmək olar.

Moruq

Moruq qırmızı, qara, bənövşəyi və sarı rəngdə olur. Bir porsiya moruq orqanizmin C vitamini və manqana olan gündəlik tələbatının təxminən 30 faizini qarşılayır. C vitamini immuniteti gücləndirir, kollagen sintezini dəstəkləyir, antioksidant müdafiəni artırır və dəmirin mənimsənilməsinə kömək edir. Moruğun ən böyük üstünlüyü liflə zəngin olmasıdır. Bir stəkan moruqda təxminən 8 qram lif var ki, bu da siyahıdakı ən yüksək göstəricidir. Bundan əlavə, moruq ürək xəstəlikləri və diabet riskini azaltmağa kömək edə bilən antosianlar və ellagitaninlərlə zəngindir.

Qaragilə

Qaragilə dünyanın ən faydalı giləmeyvələrindən biri hesab olunur. Az kalorili olmaqla yanaşı, C və K vitaminləri, həmçinin antosianlarla zəngindir. Bu bitki mənşəli birləşmələr giləmeyvəyə tünd rəng verir və ürək xəstəlikləri, 2-ci tip diabet, eləcə də idrak funksiyalarının zəifləməsi riskinin azalması ilə əlaqələndirilir. Qaragiləni yoqurda, smuzilərə, salatlara və müxtəlif yeməklərə əlavə etmək mümkündür. Kiçik ölçüsünə baxmayaraq, o, ən qidalandırıcı giləmeyvələrdən biri hesab edilir.