Şirniyyatı bu meyvələrlə əvəz edin – həm dadlıdır, həm faydalı

Mağaza şirniyyatları əvəzinə meyvə yemək orqanizmin vəziyyətini əhəmiyyətli dərəcədə yaxşılaşdıra və qidalanma keyfiyyətini artıra bilər.

News24.az xəbər verir ki, bu barədə “VeryWell Health” nəşri yazıb.

Bildirilib ki, bir çox meyvənin tərkibindəki təbii fruktoza onları şokolad qədər şirin edir, lakin meyvələrdə olan lif qanda şəkərin kəskin yüksəlməsinin qarşısını alır.

Nəşr şirniyyatları əvəz edə biləcək 7 meyvənin siyahısını təqdim edib:

Manqo - Manqo şirinlik baxımından meyvələrin “kralı” hesab olunur. Bir fincan manqoda 22 qramdan çox təbii şəkər var. “Foods” jurnalında dərc olunan araşdırmaya görə, manqo qlükoza səviyyəsinin tənzimlənməsinə və oksidləşdirici stressin azalmasına kömək edir.

Xurma - Xurma desertlərdə təbii şəkər əvəzedicisi kimi istifadə olunur. Çox şirin olmasına baxmayaraq, onun qlisemik indeksi aşağıdır. Mütəxəssislər bildirirlər ki, xurma xolesterini artırmır, əksinə ürək üçün faydalı ola bilər.

Üzüm - Üzümü tez-tez “təbii konfet” adlandırırlar. Alimlər qeyd edir ki, onun tərkibindəki polifenollar qan təzyiqini azaltmağa və lipid profilini yaxşılaşdırmağa kömək edir.

Ananas - Ananas həm təzə, həm də bişmiş halda dadlıdır. Onun tərkibində olan bromelain fermentinin güclü iltihabəleyhinə təsir göstərdiyi və toxumaların daha sürətli bərpasına kömək etdiyi bildirilir.

Banan - Banan yetişdikcə daha da şirinləşir. O, kalium və maqneziumla zəngindir. Amerika Ürək Assosiasiyasının məlumatına görə, bu maddələr ürək-damar sisteminin sağlamlığını dəstəkləyir və təzyiqi normallaşdırır.

Albalı - Şirin albalı növləri desert dadına malikdir. Onlar damarları qoruyan antosianlarla zəngindir. Dietoloqlar bildirirlər ki, albalının müntəzəm istifadəsi qaraciyərin vəziyyətini yaxşılaşdırır və metabolik pozuntular riskini azaldır.

Armud - Armud mağaza qəlyanaltılarına şirəli və faydalı alternativ sayılır. Tərkibində çoxlu həll olunan lif, xüsusilə pektin var. Mütəxəssislərin fikrincə, bu maddə həzmi yaxşılaşdırır və 2-ci tip diabet riskini azaldır.