İrsi yolla keçən xərçəng növü açıqlandı

Bəzi genetik mutasiyalar süd vəzi xərçənginin irsi riskini əhəmiyyətli dərəcədə artıra bilər.

News24.az xəbər verir ki, bu barədə rusiyalı onkoloq və kimyaterapevt Maqomed Sulimanov açıqlama verib.

Həkimin sözlərinə görə, ailədə xərçəng xəstəliyinin olması həmişə xəstəliyin irsi xarakter daşıdığını göstərmir.

Lakin ailə tarixçəsi qiymətləndirilərkən yaxın qohumlarda hansı xərçəng növünün aşkarlandığı və diaqnozun neçə yaşında qoyulduğu nəzərə alınmalıdır.

Sulimanov qeyd edib ki, yalnız ana və nənə tərəfdən olan qohumlar deyil, ata tərəfdən olan qadın qohumların xəstəlik tarixçəsi də əhəmiyyətlidir.

Xüsusilə süd vəzi, yumurtalıq və uşaqlıq xərçəngi halları həkimə bildirilməlidir.

Onkoloqun sözlərinə görə, BRCA1 və BRCA2 genlərindəki mutasiyalar irsi süd vəzi xərçəngi ilə əlaqəli ən yaxşı öyrənilmiş genetik dəyişikliklərdəndir. Bu genlər normal halda DNT-də yaranan zədələrin bərpasında iştirak edir. Onlarda baş verən müəyyən mutasiyalar isə bədxassəli şişlərin yaranma riskini artıra bilər.

Həkim ABŞ Milli Xərçəng İnstitutunun məlumatlarına istinad edərək bildirib ki, BRCA1 və ya BRCA2 mutasiyası daşıyan qadınlarda süd vəzi xərçənginə tutulma riski 80 faizi keçə bilər. Bununla belə, mutasiyanın aşkarlanması qadının mütləq xərçəngə tutulacağı demək deyil.

Sulimanov vurğulayıb ki, genetik mutasiyanın aşkarlanması profilaktik əməliyyatın dərhal aparılmasını zəruri etmir. Belə qərarlar hər bir pasiyentin vəziyyəti və fərdi riskləri nəzərə alınmaqla qəbul edilməlidir.