Neçə saat yatmalıyıq? – Yaşa görə ideal yuxu müddəti açıqlandı

Mütəxəssislər hesab edirlər ki, hər kəsin eyni müddətdə yatmağa ehtiyacı yoxdur. Araşdırmalara görə, yuxuya olan ehtiyac yaş artdıqca dəyişir. Bununla belə, vacib olan yalnız yuxunun müddəti deyil, gün ərzində insanın özünü necə hiss etməsidir.

News24.az-ın xəbərinə görə, mütəxəssislər bildirirlər ki, uzun illərdir "gündə ən azı 8 saat yatmaq lazımdır" fikri geniş yayılsa da, bu, hər kəs üçün keçərli deyil. İnsanın yuxu ehtiyacı yaşından, həyat tərzindən, stress səviyyəsindən və sağlamlıq durumundan asılı olaraq dəyişə bilər.

Yuxu zamanı yaddaş möhkəmlənir, sinir sistemi bərpa olunur, hormonal balans tənzimlənir və fiziki-psixoloji sağlamlıq üçün vacib proseslər baş verir. Buna görə də yuxunun keyfiyyəti onun müddəti qədər önəmlidir.

Mütəxəssislərin tövsiyələrinə əsasən ideal yuxu müddəti belədir:

0-3 aylıq körpələr – 14-17 saat

4-11 aylıq körpələr – 12-15 saat

1-2 yaş – 11-14 saat

3-5 yaş – 10-13 saat

6-13 yaş – 9-11 saat

14-17 yaş – 8-10 saat

18-64 yaş – 7-9 saat

65 yaşdan yuxarı – 7-8 saat

Mütəxəssislər vurğulayırlar ki, bəzi insanlar 6-7 saat yuxudan sonra özlərini enerjili hiss etdikləri halda, digərləri 9 saat yatdıqdan sonra belə yorğun ola bilərlər. Bunun əsas səbəbi yuxunun keyfiyyətidir.

Gecə ərzində tez-tez oyanmaq, yüksək stress və ya yuxu pozuntuları insanın kifayət qədər yatmasına baxmayaraq, özünü yorğun hiss etməsinə səbəb ola bilər. Buna görə də ekspertlər ilk növbədə gün ərzindəki enerji səviyyəsinə və ümumi vəziyyətə diqqət yetirməyi tövsiyə edirlər.