Payızda ayaqlar niyə çox üşüyür? - Həkim gizli səbəbləri AÇIQLADI

Payızda isti corablar geyinsək belə, bəzən ayaqların sürətlə soyumasının arxasında təkcə hava şəraiti dayanmır.

News24.az xəbər verir ki, bu barədə rusiyalı həkim-terapevt Svyatoslav Krupenin açıqlama verib.

Həkim bildirib ki, soyuq havada orqanizm daxili orqanları qorumaq üçün ətraflara qan axınını azaldır və damarlar daralır. Hərəkətsizlik isə əzələlərin daha az istilik istehsal etməsinə səbəb olur.

Krupenin sözlərinə görə, dar ayaqqabılar qan dövranını pozur, ayaqlar isə nəm çəkərək istini daha pis qoruyur.

Problemin qarşısını almaq üçün mütəxəssis aşağıdakı qaydalara əməl etməyi məsləhət görür:

Doğru seçim: Ayaqqabılar sərbəst, ölçüyə uyğun və sıxmayan olmalıdır. Corablar isə yun və ya xüsusi termo materiallardan seçilməlidir.

Quruluq və hərəkət: Ayaqların quru qalmasına diqqət yetirilməli və daha çox hərəkət edilməlidir.

İsinmə üsulları: Ayaqları isitmək üçün qaynar deyil, isti vannalardan istifadə etmək olar. Həkim xəbərdarlıq edir ki, alkoqol vasitəsilə isinməyə çalışmaq təhlükəlidir, çünki o, yalnız aldadıcı istilik hissi yaradaraq istilik itkisini sürətləndirir.

Əgər ayaqlar sadəcə küçədə donub evdə 10–30 dəqiqə ərzində isinirsə, bu, normal reaksiyadır. Lakin istidə belə daimi üşütmə, keyimə, şişkinlik, dərinin rənginin dəyişməsi xəbərdaredici siqnal olmalıdır. Bu cür əlamətlər anemiya, hipotireoz, diabet, həmçinin damar və sinir problemlərindən xəbər verə bilər.

Mütəxəssis bu cür şikayətlər zamanı ilkin mərhələdə terapevtə, ehtiyac yaranarsa isə damar cərrahı, endokrinoloq və ya nevroloqa müraciət etməyi tövsiyə edir.