Qan təzyiqini normallaşdırmağa kömək edən şorbaların adları açıqlandı

Diyetoloq Keytlin Bil qan təzyiqinin tənzimlənməsinə kömək edən bir neçə şorba növünü açıqlayıb.

News24.az xəbər verir ki, “Health” jurnalına müsahibəsində danışan mütəxəssisin sözlərinə görə, bu yeməklərin faydası onların tərkibindəki lif, kalium və maqneziumla bağlıdır.

Diyetoloq ən faydalı seçimlərdən biri kimi mərcimək şorbasını göstərib. Onun sözlərinə görə, bir stəkan bişmiş mərciməyin tərkibində təxminən 16 qram lif və 731 milliqram kalium var. Lif qan təzyiqinin idarə olunmasına kömək edir, kalium isə qan damarlarının rahatlamasında və orqanizmdən artıq natriumun xaric edilməsində rol oynayır.

Mütəxəssis qara lobya və doğranmış noxuddan hazırlanan şorbaları da tövsiyə edib. Bu məhsullar qan təzyiqinin tənzimlənməsi üçün əhəmiyyətli olan lif, kalium və maqneziumla zəngindir.

Digər faydalı seçim isə pomidor, lobya və müxtəlif tərəvəzlərdən hazırlanan italyan minestrone şorbasıdır. Bildirilib ki, bu yemək qan təzyiqinin aşağı salınmasına yönəlmiş DASH pəhrizinin prinsiplərinə uyğundur. Pomidor şorbası isə kalium və antioksidant xüsusiyyətli likopenlə zəngindir.

Keytlin Bil toyuq şorbasını da qida rasionuna daxil etməyi məsləhət görüb. Onun sözlərinə görə, bu şorbanı kartof, tərəvəz, paxlalı bitkilər və ya tam taxıllarla hazırlamaq daha məqsədəuyğundur.

Diyetoloq bütün bu yeməkləri hazırlayarkən duzun miqdarına xüsusi diqqət yetirməyin vacibliyini vurğulayıb. Çünki həddindən artıq duz qəbulu qan təzyiqinin yüksəlməsinə səbəb ola və yeməklərin faydalı təsirini azalda bilər.